నటుడు, జర్నలిస్టు టీఎన్ఆర్ కుటుంబానికి మెగాస్టార్ చిరంజీవి లక్ష రూపాయలు సాయం చేశారు. త‌మ ప్ర‌తినిధి ద్వారా వారి కుటుంబానికి ఈ మొత్తాన్ని అంద‌జేశారు. టీఎన్ఆర్ భార్యా పిల్లలకు ఫోన్ చేసి పరామర్శించారు. టీఎన్ఆర్ చేసిన ఎన్నో ఇంటర్వ్యూలు చూశానని, తాను ఇంటర్వ్యూ చేసే విధానం ఎంతో ఆకట్టుకునేదని గుర్తుచేశారు. జీవితంలో పట్టుదలతో ఎదిగిన టీఎన్ఆర్ ఎంతో మందికి స్ఫూర్తిదాయకంగా నిలుస్తారని అన్నారు. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నానని చెప్పారు. టీఎన్ఆర్ కుటుంబానికి ఎలాంటి అవసరమొచ్చినా తాను అండగా నిలుస్తానని హామీ ఇచ్చారు.
మీరంటే వీరాభిమానం: చిరుతో టీఎన్ఆర్ భార్య
‘మీరంటే వీరాభిమానం సార్. తన 200వ ఇంటర్వ్యూ మీతోనే చేయాలని అనుకునేవారు. ఇంతవరకు మిమ్మల్ని కలవలేదు. మీరు మాకిలా ఫోన్ చేయడం ధైర్యాన్ని కలిగించింది’ అని అన్నారు టీఎన్ఆర్ సతీమణి . లక్ష రూపాయలు అంద‌జేసినందుకు కృత‌జ్ఞ‌త‌లు తెలిపారామె.