అమెరికా 46వ అధ్యక్షుడిగా జో బైడెన్ ఇటీవ‌లే ప్ర‌మాణ స్వీకారం చేసి బాధ్య‌త‌ల‌ను చేప‌ట్టిన విష‌యం విదిత‌మే. ఈ క్ర‌మంలోనే బైడెన్ ప్ర‌మాణ స్వీకారానికి ముందుగానే ట్రంప్ అధ్య‌క్ష భ‌వ‌నం ఖాళీ చేసి వెళ్లిపోయారు. ఇక ప్ర‌మాణం అనంత‌రం బైడెన్ వైట్ హౌజ్‌లోకి కుటుంబంతో క‌లిసి వ‌చ్చారు. అయితే వైట్ హౌజ్‌లో అధ్య‌క్షుడి కార్యాల‌యం ఓవ‌ల్ ఆఫీస్‌లో డెస్క్ మీద ఓ బటన్ ఉండేది. ట్రంప్ ఉన్న‌ప్పుడు ఆ బటన్ ఉంది. కానీ బైడెన్ వ‌చ్చాక ఆ బ‌ట‌న్‌ను తీసేశారు. ఇంత‌కీ అస‌లు ఏంటా బటన్ ? ఎందుకు తీసేశారు ? అంటే…
ఓవ‌ల్ ఆఫీస్‌లో డెస్క్ మీద చెక్క‌తో చేసిన ఓ బాక్స్ ఉండేది. అందులో ఓ రెడ్ బటన్ ఉంటుంది. ట్రంప్ అధ్యక్షుడిగా ఉన్న స‌మ‌యంలో ఆ బ‌ట‌న్‌ను ఆయ‌న ప్రెస్ చేస్తే వైట్ హౌజ్‌లోని బ‌ట్ల‌ర్ వ‌చ్చి ఆయనకు సోడా ఇచ్చి వెళ్లేవారు. ట్రంప్ ఆ బ‌ట‌న్‌ను అందుకే ఉప‌యోగించేవారు. అయితే బైడెన్ వ‌చ్చాక ఆ బటన్ మాయ‌మైంది. సాధార‌ణంగా ఎవ‌రైనా స‌రే కొత్త‌గా ఉద్యోగంలో చేరితే త‌న‌కు కేటాయించిన గ‌దిలో త‌న‌కు అనుకూలంగా, త‌న‌కు కావ‌ల్సిన వ‌స్తువుల‌ను ఏర్పాటు చేసుకుంటారు. త‌న‌కు సౌక‌ర్య‌వంతంగా ఉండేలా రూమ్‌ను మార్చుకుంటారు. అందులో భాగంగానే బైడెన్ కూడా త‌న కార్యాలయంలో ప‌లు మార్పులు చేశారు. బ‌హుశా ఆయనకు ఆ బ‌ట‌న్‌తో అవ‌స‌రం లేద‌నిపించింది కాబోలు. అందుక‌నే బైడెన్ ఆ బ‌ట‌న్‌ను తీసేయించారు.
President Biden has removed the Diet Coke button. When @ShippersUnbound and I interviewed Donald Trump in 2019, we became fascinated by what the little red button did. Eventually Trump pressed it, and a butler swiftly brought in a Diet Coke on a silver platter. It's gone now. pic.twitter.com/rFzhPaHYjk
— Tom Newton Dunn (@tnewtondunn) January 21, 2021
తాజాగా బైడెన్ ఓవ‌ల్ ఆఫీస్‌లో ఉన్న‌ప్పుడు తీసిన ఫొటోల్లో ఆయ‌న డెస్క్ మీద రెడ్ బటన్ లేదు. అందుక‌నే ఈ విష‌యం హాట్ టాపిక్ అయింది. అయితే ప్ర‌స్తుతం బైడెన్ డెస్క్ మీద రెండు ఫోన్లు, ఒక కాఫీ క‌ప్పు, ఒక సెట్ పెన్నులు మాత్ర‌మే క‌నిపించాయి. ఇక కార్యాలయంలో ఆయ‌న మాజీ అధ్యక్షుడు ఆండ్రూ జాక్స‌న్ ఫొటోకు బ‌దులుగా మ‌రో మాజీ అధ్యక్షుడు ఫ్రాంక్లిన్ డి.రూజ్‌వెల్ట్‌కు చెందిన ఫొటోను ఏర్పాటు చేయించారు. అలాగే ప‌లువురు ముఖ్య నాయ‌కుల ఫొటోల‌ను కూడా ఆయ‌న గ‌దిలో పెట్టించారు. అవును.. ఎవ‌రికి అనుగుణంగా వారు ఫొటోల‌ను పెట్టిస్తారు క‌దా. బైడెన్ కూడా అదే చేశారు.
