పడవ ప్రమాదానికి మంత్రి అవంతి శ్రీనివాస్ బాధ్యుడు కదా..
మరి పడవ ముంచి అవార్డులు ఎలా అందుకుంటారు.?
మంతెన సత్యనారాయణ రాజు, శాసనమండలి సభ్యుడు
గోదావరిలో పడవ ప్రమాదానికి కారణమైన మంత్రి అవంతి శ్రీనివాస్ పర్యాటకాభివృద్ధికి సంబంధించిన అవార్డు తీసుకోవడానికి సిగ్గుపడాలి. పడవ మునిగి దాదాపు 15 రోజులవుతున్నా బయటకు తీయకుండా రాజకీయ విమర్శలు చేయడం అవంతి దిగజారుడుతనానికి నిదర్శనం. తెలుగుదేశం ప్రభుత్వం చేసిన అభివృద్ధికి వైసీపీ ప్రభుత్వం తరఫున అవార్డు తీసుకోవడం శోచనీయం. వైసీపీ నాలుగు నెలల పాలనలో పర్యాటకంపై ఒక్కటంటే ఒక్క సమీక్ష గానీ, అభివృద్ధిగానీ చేయకుండా.. అవార్డు ఎలా వచ్చిందో, ఎవరు చేసిన కృషికి అవార్డు వచ్చిందో ఆలోచించుకోవాలి. నోరు తెరిస్తే అబద్దం మాట్లాడుతున్న అవంతి శ్రీనివాస్ ఇప్పుడు తీసుకున్న అవార్డుతో తెలుగుదేశం ప్రభుత్వ అభివృద్ధిని ఢిల్లీ సాక్షిగా ఒప్పుకున్నారు. తెలుగుదేశం హయాంలో అసలేం చేయలేదు అంటూ మొన్నటికి మొన్న విమర్శించారు. ఇప్పుడు ఆయన శాఖ దేశంలోనే నెంబర్‌ వన్‌ అంటూ కేంద్రం ఇచ్చిన అవార్డును అందుకున్నారు. మంత్రిగారూ తెలుగుదేశం హయాంలో పర్యాటకరంగంలో జరిగిన అభివృద్ధిని, మీ చేతగానితనాన్ని ఇప్పటికైనా ఒప్పుకోండి. చేతకాని వారికే చేష్టలెక్కువ అన్నట్లు.. పర్యాటకానికి తెలుగుదేశం చొరవేంటో తెలుసు గనకే అవార్డుల స్వీకారం నాడు.. అధికారులు కనీసం అవార్డును ముట్టుకోనీయకుండా అడ్డుకున్నారు. ఇదెక్కడి సంస్కృతో అవంతికే తెలియాలి. నవ్వుతూ.. నమ్మించి మోసం చేయడంలో జగన్‌ను అవంతి మించిపోయారు. విశాఖలో వాక్‌ స్వాతంత్రాన్ని హరిస్తూ అక్రమ కేసులు పెట్టడం మాని.. గోదావరిలో మునిగిన పడవను బయటకు తీయడంపై దృష్టి పెట్టండి.
