ప్రపంచంలోనే అత్యంత కలుషిత నగరాల లిస్ట్ లో ముంబై కొత్త రికార్డ్ నమోదు చేసింది. దేశ ఆర్థిక రాజధానిగా పేరుగాంచిన ముంబై మహానగరం తాజాగా ఓ చెత్త రికార్డును నమోదు చేసుకుంది. జనవరి 29 నుంచి ఫిబ్రవరి 8వ తేదీల మధ్య నమోదైన కాలుష్యం ఆధారంగా ప్రపంచంలోని అత్యంత కలుషిత నగరాల జాబితాను.. ఎయిర్ ట్రాకింగ్ ఇండెక్స్ ఐక్యూ ఎయిర్ ఈ తయారు చేసింది. ఈ లిస్ట్ లో ముంబై 225 పాయింట్స్ తో రెండో స్థానంలో నిలిచింది. జనవరి 29న ర్యాంకింగ్స్‌ లో 10వ స్థానంలో ఉన్న ముంబై.. ఫిబ్రవరి 2న ప్రపంచంలోనే రెండో అత్యంత కాలుష్య నగరంగా మారింది.
ఆ తర్వాత పరిస్థితి కాస్త మెరుగుపడినా.. ఫిబ్రవరి 8న మళ్లీ రెండో స్థానానికి చేరింది. ఫిబ్రవరి 13న మరలా మూడో స్థానంలో నిలిచింది. గతేడాది నవంబర్‌తో పాటు ఈ ఏడాది జనవరి నెలల్లో ముంబైలో గాలి నాణ్యత ఎక్కువగా ‘పూర్’, ‘వెరీ పూర్’ కేటగిరీలోనే నమోదైందని సెంట్రల్ పొల్యూషన్ కంట్రోల్ బోర్డ్ గణంకాలు వెల్లడిస్తున్నాయి.
వాహనాల నుంచి వెలువడే కాలుష్యం, దుమ్ము, ధూళి కారణంగా గాలి నాణ్యత పడిపోయిందని నిపుణులు చెబుతున్నారు. చలికాలం కావడం, నిర్మాణ వ్యర్థాలు కూడా పరిస్థితికి కారణమని అంటున్నారు. గాలి వేగం నెమ్మదించడం వల్ల కూడా ఎయిర్ క్వాలిటీ పడిపోయిందని నిపుణులు వెల్లడించారు. లా నినా సైక్లోన్ ఎఫెక్ట్ తో గాలి వేగం నెమ్మదించడం వల్ల కూడా ఎయిర్ క్వాలిటీ పడిపోయిందని పేర్కొన్నారు.
సెంట్రల్ పొల్యూషన్ కంట్రోల్ బోర్డు ఇచ్చిన సమాచారం ఆధారంగా ఈ సర్వే చేపట్టారు. ఇదిలా ఉంటే.. ముంబైలో గాలి నాణ్యత పడిపోవడంతో బృహన్‌ ముంబై మున్సిపల్‌ కార్పొరేషన్‌ చర్యలు చేపట్టింది. రాబోయే 10 రోజుల పాటు నగరంలో నిర్మాణ కార్యకలాపాలను నిషేధించింది.