లూనార్ రికానసెన్స్ ఆర్బిటర్ వ్యోమనౌక సహాయంతో విక్రమ్ చిత్రాలను తీశామని నాసా ప్రకటించింది. చంద్రుని దక్షిణ ధ్రువంపై సాఫ్ట్ ల్యాండింగ్ అయ్యే క్రమంలో తడబడిన ల్యాండర్ ‘విక్రమ్’ ఫోటోలను తమ లూనార్ రికానసెన్స్ ఆర్బిటర్ వ్యోమనౌక తీసినట్లు నాసా ప్రకటించింది. రెండు రోజుల క్రితం తమ ఆర్బిటర్ పంపిన ల్యాండర్ విక్రమ్ చిత్రాలను పరిశీలిస్తున్నట్లు తెలిపింది. కొత్త చిత్రాలను పాత వాటితో పోల్చి చూసిన తరువాతే ల్యాండర్ కనిపించినదీ లేనిదీ తెలుస్తుందని ఓ నాసా శాస్త్రవేత్త చెబుతున్నారు. ఫోటోలు తీసేటప్పుడు ల్యాండర్ వ్యోమనౌక నీడలోనో లేదా నిర్దేశిత ప్రాంతానికి బయట ఉండొచ్చని ఆయన చెబుతున్నారు. లూనార్ ఆర్బిటర్ చంద్రునికి అత్యంత సమీపం నుంచి ఫోటోలు తీయడం వల్ల ఎక్కువ ప్రదేశం నీడలో ఉన్నట్లు నాసా శాస్త్రవేత్త వివరించారు.
ఇలావుంటే, చంద్రయాన్-2 ఆర్బిటర్ చంద్రుని కక్ష్యలో సాధారణంగానే పనిచేస్తున్నట్లు ఇస్రో ప్రకటించింది. పేలోడర్స్ కూడా బాగానే పనిచేస్తున్నట్లు తెలిపింది. ల్యాండర్ విక్రమ్తో సంబంధాలు కలవకపోవడానికి గల కారణాలను జాతీయస్థాయి కమిటీతో పాటు ఇస్రో నిపుణులు విశ్లేషణ చేస్తున్నట్లు చెప్పారు.