కరోనా.. ప్ర‌పంచంలో ఈ పేరు తెలియ‌ని వారు ఉండ‌రు. ప్ర‌పంచ దేశాల్లో వ‌ణుకు పెట్టించిన కరోనా.. ఇప్పుడు మ‌రో స‌మ‌స్య‌ను మోసుకొచ్చింది. ఇటీవల ఐఐటీ ముంబాయి చేసిన అధ్యయనంలో సంచ‌ల‌న విష‌యాలు బ‌య‌టప‌డ్డాయి. కరోనా బారిన పడి కోలుకున్న మగవాళ్లలో సంతానోత్పత్తి తగ్గుతుందని తేలింది. దీనిని ఐఐటీ ముంబాయితో కలిసి జస్లోక్ ఆస్పత్రి, రీసెర్చ్ సెంటర్ పరిశోధకులు సంయుక్తంగా నిర్వహించారు.
కోవిడ్ నుంచి కోలుకున్న పురుషుల వీర్యంలోని ప్రోటీన్ స్థాయిలను విశ్లేషించిన‌ట్టు పరిశోధకులు పేర్కొన్నారు. దీనిని బట్టి తక్కువ లక్షణాలతో వైరస్ బారిన పడిన పురుషుల సంతానోత్పత్తికి సంబంధించిన ప్రోటీన్లు దెబ్బతింటాయని తెలిపారు. కోవిడ్‌కు కారణమైన సార్స్-2 వైరస్ ప్రధానంగా శ్వాసకోశ వ్యవస్థను ప్రభావితం చేస్తుందని.. దాంతో పాటు ఇతర కణజాలాలను కూడా దెబ్బతీస్తుందని పరిశోధనలో వెల్ల‌డైంద‌ని చెప్తున్నారు.
ఈ అధ్యయనంలో 20 నుంచి 45 సంవత్సరాల వయస్సు గల పది మంది ఆరోగ్యవంతమైన మగవాళ్ల వీర్యంతో పాటు.. కోవిడ్ బారి నుంచి కోలుకున్న మగవాళ్ల వీర్య నమూనాలను విశ్లేషించామంటున్నారు. అయితే.. ఆరోగ్యవంతమైన మగవాళ్లలో కంటే కరోనా సోకిన వారిలో వీర్య కణాలు బాగా తగ్గినట్టు పరిశోధకులు గుర్తించారు. సంతానోత్పత్తికి సంబంధించిన రెండు ప్రోటీన్లు.. సెమెనోజెలిన్ 1, ప్రోసాపోసిన్ కరోనా నుంచి బయటపడినవారిలో తక్కువ స్థాయిలో ఉన్నట్టు స్ప‌ష్టం చేశారు.
కోవిడ్ సార్స్ కోవ్ 2 పురుషుల సంతానోత్పత్తి ఆరోగ్యంపై ప్రత్యక్షంగా.. పరోక్షంగా కూడా ప్రభావం చెందుతోంద‌ని పరిశోధనలో తేలాయంటున్నారు. అయితే.. పరిశోధనలో వెల్లడైన వీటిని నిర్ధారించడానికి లోతుగా అధ్యయనం జరగాలని పరిశోధకులు అభిప్రాయ‌ప‌డుతున్నారు.
