వైఎస్ వివేకా హత్య కేసు కొత్త రంగుల‌ను పులుముకుంటోంది. సీబీఐ విచార‌ణ‌లో కొత్త అంశాలు వెలుగులోకి వస్తున్నాయి. తాజాగా.. వివేకా వద్ద టైపిస్టుగా పనిచేసిన షేక్‌ ఇనయతుల్లా సీబీఐకి ఇచ్చిన వాంగ్మూలంలో కీల‌క విష‌యాల‌ను వెల్ల‌డించిన‌ట్టు తెలుస్తోంది. వివేకా మృతి త‌ర్వాత తొలుత ఆయన ఇంట్లోని బాత్ రూమ్, బెడ్ రూమ్ లోకి అవినాశ్.. దేవిరెడ్డి శంకర్ రెడ్డిలే వెళ్లారని ఆయన పేర్కొన్నారు. ఆ తరువాతనే మిగిలినవారు లోపలకు వెళ్లారని చెప్పారు.
వివేకా మృతదేహం ఫొటోల్ని తాను తీశానని ఇనయతుల్లా సీబీఐకి చెప్పారు. తాను ఫొటోలు తీస్తున్నట్లు గుర్తించిన ఈసీ సురేంద్రనాథ్ రెడ్డి తన పైన ఆగ్రహం వ్యక్తం చేసారని ఆయన తెలిపారు. ఆ సమయంలో వివేకా పీఏ ఎం.వి.కృష్ణారెడ్డి గదిలో ఉన్నారని.. వివేకాకు ఏదో జరిగిందన్న అనుమానం తనకు ఉందంటూ ఆయనతో చెప్పానని వెల్లడించారు. కొంతసేపయ్యాక వివేకా గుండెపోటుతో చనిపోయారని.. గాయాలకు బ్యాండేజీ, కాటన్‌ చుట్టాలంటూ వారు చెప్పారని వివరించారు. దీంతో పాటుగా ఆ సమయంలో రక్తపుమడుగు శుభ్రం చేయాలంటూ ఎర్ర గంగిరెడ్డి తనతో చెప్పారని ఇనయతుల్లా వివరించారు. తాను స్పందించకపోవటంతో తన పైన కేకలు వేశారని వివరించారు.
గంగిరెడ్డి ఎందుకు అంతగా కంగారు పడుతున్నాడని తాను వివేకా పీఏ కృష్ణారెడ్డిని ప్రశ్నించానని చెప్పుకొచ్చారు. అయితే.. ఆయన సైతం అదే తనకూ అర్దం కావటం లేదని సమాధానమిచ్చాడని ఇనయతుల్లా తన వాంగ్మూలంలో వివరించారు. ఆ తరువాత భాస్కర రెడ్డి.. మనోహర్ రెడ్డిలు వివేకా మృతదేహాన్ని ఉంచేందుకు ఇంట్లోకి ఫ్రీజర్‌ బాక్సు తెప్పించారంటూ సీబీఐకి వివరించారు. ఘటన జరిగిన వెంటనే పులివెందుల సీఐ శంకరయ్య అక్కడకు వచ్చి బాత్ రూమ్ ను పరిశీలించారని తెలిపారు. ఆ సమయంలో అక్కడ ఉన్న అల్మారా హ్యాండిల్‌ విరిగి ఉండటాన్ని తాను చూసానని వివరించారు. అంతకుముందు అది విరిగి లేదనే విషయాన్ని శంకరయ్యకు చెప్పినట్లుగా ఇనయతుల్లా పేర్కొన్నారు.
గోడల పైన రక్తపు మరకలను గమనించానంటూ తన వాంగ్మూలంలో వివరించారు ఇనయతుల్లా. తనకు అనుమానం రాగానే.. వివేకాను ఎవరో చంపి ఉంటారనే అనుమానం ఉందని తాను సీఐ శంకరయ్యతో చెప్పానని వివరించారు. దానికి మీ సార్ ను చంపాల్సిన అవ‌స‌రం ఎవరికి ఉంట‌ద‌ని.. ఆయన కమోడ్ పై పడిపోయుంటారని సీఐ చెప్పిన‌ట్టుగా వివరించారు.
వివేకా మృతదేహాన్ని చూస్తున్న సమయంలో ఆయన మెడ వంగినట్లుగా కనిపించిందని ఇనయతుల్లా చెప్పారు. సరి చేయాలని ప్రయత్నించే సమయంతో తన చేతి వేళ్లు వివేకా పుర్రెలోకి వెళ్లాయని.. దీంతో పెద్దగా ఏడుస్తూ కేకలు వేశానని వివరించారు. తల వెనుక వైపునా తీవ్రంగా గాయాలు అయినట్లు చూశానని చెప్పారు. గంగిరెడ్డి నమ్మదగ్గ వ్యక్తి కాదని వివేకా తనతో చెప్పారని ఇనయతుల్లా తన వాంగ్మూలంలో వివరించినట్లుగా సీబీఐ నమోదు చేసిన వాంగ్మూలంలో పేర్కొన‌బ‌డింది.