గత కొన్ని రోజులుగా చల్ల గాలులు వీచిన హైదరాబాద్ లో మంగళవారం ఒక్క సారిగా వాతావరణంలో మార్పులు జరిగాయి. నగరానికి చుట్టు పక్కల జిల్లాల్లో సైతం రాత్రి ఉష్ణోగ్రతలు స్వల్పంగా పెరిగాయి. దీంతో నగరంలో సగటు కనిష్ట ఉష్ణోగ్రత 14.4 డిగ్రీల సెల్సియస్ గా నమోదైంది.
అయితే.. ఆశించిన పరిధి కంటే తక్కువగా ఉన్నప్పటికీ.. అది 10 డిగ్రీల సెల్సియస్ కంటే తగ్గలేదు. మంగళవారం తెల్లవారుజామున శేరిలింగంపల్లి, రాజేంద్రనగర్‌ తో సహా నగరంలోని కొన్ని ప్రాంతాల్లో రాత్రి ఉష్ణోగ్రత 10 డిగ్రీల సెల్సియస్ గా నమోదైంది.
తెలంగాణ స్టేట్ డెవలప్‌ మెంట్ ప్లానింగ్ సొసైటీ వివిధ ఆటోమేటిక్ వెదర్ స్టేషన్‌ లలో నమోదు చేసిన డేటా ప్రకారం.. బుధవారం నుండి నగరంలోని దాదాపు ప్రతి ప్రాంతంలో రాత్రి ఉష్ణోగ్రతలు రెండు నుండి నాలుగు డిగ్రీలు పెరిగే అవకాశం ఉన్నట్టు వాతావరణ శాఖ వెల్లడించింది.
ఈ సమయంలో నగరంలో గరిష్ట ఉష్ణోగ్రత 30 డిగ్రీల సెల్సియస్ నుండి 33 డిగ్రీల సెల్సియస్ వరకు ఉండవచ్చని అధికారులు పేర్కొన్నారు. భారత వాతావరణ శాఖ, హైదరాబాద్ సూచన ప్రకారం.. నగరంలో రాత్రి ఉష్ణోగ్రతలు వారాంతానికి మళ్లీ పడిపోవచ్చని వెల్లడైంది.
