నిఖిల్ హీరోగా భారీ బడ్జెట్ తో తెరకెక్కుతున్న చిత్రం ‘స్పై. నిఖిల్ కెరీర్ లోనే భారీ బడ్జెట్ సినిమా ఇది. ప్రస్తుతం ఈ మూవీ షూటింగ్ శరవేగంగా జరుగుతోంది. గూఢచారి, ఎవరు, హిట్ లాంటి సూపర్ హిట్ చిత్రాల ఎడిటర్ గా చేసిన గ్యారీ బిహెచ్ దర్శకత్వంలో ఎడ్ ఎంటర్‌టైన్‌మెంట్స్ పై నిర్మాత కె.రాజశేఖర్ రెడ్డి నిర్మిస్తున్న ఈ చిత్రానికి సంబంధించి ప్రస్తుతం హై వోల్టేజ్ యాక్షన్ ఎపిసోడ్స్ షూట్ చేస్తున్నారు.
హాలీవుడ్ సినిమాటోగ్రాఫర్ జూలియన్ ఎస్ట్రాడా తో పాటు ఈ యాక్షన్ సెట్స్ లో, బాలీవుడ్ ప్రముఖ సినిమాటోగ్రాఫర్ కైకో నకహరా కూడా పాల్గొన్నారు. ఇంతకుముందు మేరీ కోమ్, శకుంతలా దేవి, తాన్హాజీ వంటి సినిమాలకు కైకో వర్క్ చేశారు. హాలీవుడ్ స్టంట్ డైరెక్టర్ లీ విటేకర్ యాక్షన్ సన్నివేశాలను సూపర్ వైజ్ చేస్తున్నారు. బాలీవుడ్ నటుడు మకరంద్ దేశ్‌పాండే పాటు అభినవ్ గోమటం, ఐశ్వర్యా మీనన్, సన్యా ఠాకూర్‌లు షూటింగ్‌లో పాల్గొంటున్నారు.
ఇటీవల విడుదలైన ఈ సినిమా టైటిల్ పోస్టర్ ఆసక్తిని రేకెత్తించింది. తన మొదటి పాన్ ఇండియా చిత్రంగా విడుదల కాబోతున్న ‘స్పై’లో సరికొత్త లుక్, భిన్నమైన పాత్రలో అలరించనున్నాడు నిఖిల్. యాక్షన్ సన్నివేశాల కోసం అతడు ప్రత్యేకంగా ట్రయినింగ్ కూడా తీసుకున్నాడు.
పూర్తి యాక్షన్ స్పై థ్రిల్లర్‌గా భారీ స్థాయిలో రూపొందుతున్న ఈ చిత్రానికి నిర్మాత కె రాజశేఖర్ రెడ్డి కథను కూడా అందించాడు. శ్రీచరణ్ పాకాల సంగీతం అందిస్తున్నాడు. తెలుగు, హిందీ, తమిళం, కన్నడ ,మలయాళ భాషల్లో 2022 దసరాకు ప్రపంచవ్యాప్తంగా ఈ చిత్రం థియేటర్లలో విడుదల కానుంది.
