ఉక్రెయిన్ అధ్యక్షుడు వోలోడిమిర్ జెలెన్ స్కీ సంచలన వ్యాఖ్యలు చేశారు. రష్యా అధ్యక్షుడు పుతిన్ ఇంకా బతికే ఉన్నారో లేదో తనకు ఇంకా ఖచ్చితంగా తెలియదన్నారు. అసలు నిర్ణయాలు ఆయనే తీసుకుంటున్నారో లేదా వేరే ఎవరైనా నిర్ణయం తీసుకుంటున్నారో తెలియదన్నారు.
దావోస్‌లో వరల్డ్ ఎకనామిక్ ఫోరమ్ (డబ్ల్యూఈఎఫ్) సందర్బంగా నిర్వహించిన ఓ ప్రైవేట్ ఈవెంట్ లో ఆయన పాల్గొన్నారు. ఈ సందర్బంగా.. రష్యాతో శాంతి యుత చర్చలు ఎప్పుడు ప్రారంభిస్తారంటూ ఆయన్ని మీడియా ప్రశ్నలు వేసింది. దానికి ఆయన బదులిస్తూ…
తాను ఎవరితో, దేని గురించి మాట్లాడాలో తనకు అర్థం కావడం లేదన్నారు. అసలు రష్యా అధ్యక్షుడు అందుకు సరైన వ్యక్తా కాదా అనే విషయం తనకు ఖచ్చితంగా తెలియదన్నారు. అసలు ఆయన బతికే ఉన్నారా? నిర్ణయాలు ఆయనే తీసుకుంటున్నారా? లేదా ఎవరు నిర్ణయాలు తీసుకుంటున్నారు? తాము ఎవరితో శాంతి చర్చలు జరుపాలి? అన్నది తనకు అర్థం కావడం లేదన్నారు.
యుద్ధం మొదలైనప్పటి నుంచి పుతిన్ బహిరంగంగా కనిపించకపోవడం, డిసెంబర్‌లో జరుగాల్సిన వార్షిక ప్రెస్‌ మీట్‌ను కూడా రద్దు చేశారు. దీంతో పుతిన్ సజీవంగా ఉన్నారా లేదా అన్న విషయంపై జెలెన్‌స్కీ అనుమానం వ్యక్తం చేశారు. దీనిపై రష్యా తీవ్ర స్థాయిలో మండిపడింది.
ఉక్రెయిన్‌తోపాటు జెలెన్‌స్కీకి రష్యా, పుతిన్ పెద్ద సమస్య అన్నది దీంతో స్పష్టమైందని రష్యా అధ్యక్ష కార్యాలయం ప్రతినిధి డిమిత్రి పెస్కోవ్ తెలిపారు. రష్యా లేదా పుతిన్ ఉనికిలో ఉండకూడదని జెలెన్‌స్కీ భావిస్తున్నారని ఆయన అననారు. జెలెన్ స్కీ మానసికస్థితికి ఇది అద్దం పడుతోందన్నారు.