ఫిలిప్పీన్స్ ని ఉల్లి అల్లాడిస్తోంది. ఒక్కసారిగా ఉల్లిధరలు కొండెక్కి కూర్చున్నాయి.దీంతో కరెన్సీ ముందు ఉల్లిపాయ కాలరెగరేస్తోంది. కొత్తజంటకు కానుకగా ఉల్లిగడ్డని బహూకరిస్తున్నారంటే పరిస్థితి అర్ధం చేసుకోవచ్చు.
ఉల్లిని కరెన్సీ గా కన్సిడర్ చేద్దామని ఫిక్స్ అయిన ఓ షాపు ఉల్లిపాయలు ఇచ్చి ఎయిర్ ఫ్రెషనర్స్ , ఫ్యాన్లు, షవర్ కేడీలు, సిరామిక్ కుండీలు, క్యాండిల్ హోల్డర్ల వంటి వస్తువులను కొనుక్కోవచ్చని ప్రకటించింది. దీంతో చాలా మంది ప్రజలు మనీలాలోని ఈ దుకాణానికి క్యూ కడుతున్నారు.
మనీలాలోని క్యూజోన్ సిటీలోని జపాన్ హోమ్ సెంటర్ (జేహెచ్ సీ) బ్రాంచ్ లో అన్ని వస్తువుల ధర 88 పెసోలు (దాదాపు రూ.135). అంటే 88 పెసోలు లేదా అంతకంటే తక్కువ ధర ఉన్న అన్ని వస్తువులను శనివారం ఉల్లిపాయతో కొనుగోలు చేయవచ్చు. ఒక్కో ఉల్లిపాయకు రెండు సిరామిక్ కుండీలు, క్యాండిల్ హోల్డర్ ఇస్తున్నారు.
ఉల్లితో ఇక్కడ గరిష్టంగా మూడు వస్తువులను తీసుకువెళ్లవచ్చు. ఉల్లిపాయలతో చెల్లింపులను ఎంచుకునే వినియోగదారుల కోసం షాపులో ప్రత్యేక లైన్ ఉంది. ఫిలిప్పీన్స్ లో కిలో ఉల్లి ధర రూ.135కి చేరడంతో జనం ఇబ్బందిపడుతున్నారు. చికెన్, ఇతర ఆహార పదార్థాల కంటే ఉల్లి ఖరీదుగా మారింది.