ఉభ‌య‌గోదావ‌రి జిల్లాల్లో కోడి పందాలు జోరుగా కొన‌సాగుతున్నాయి. భీమ‌వ‌రం నుంచి అమ‌లాపురం వ‌ర‌కు భారీగా పందాలు జరుగుతున్నాయి. కోట్ల రూపాయలు చేతులు మారుతున్నాయి. పశ్చిమ గోదావరి ఏజెన్సీ మెట్ట ప్రాంతాల్లో గుండాట, పేకాట, కోడి పందాలు అట్టహాసంగా ప్రారంభం అయ్యాయి. జంగారెడ్డిగూడెంలో బైపాస్ రోడ్ లో పామాయిల్ తోటలో బరులు ఏర్పాటు చేశారు. జంగారెడ్డిగూడెం, జీలుగుమిల్లి, బుట్టాయిగూడెం, పోలవరం, కొయ్యలగూడెం మండలాల్లో కత్తులు దూసుకుంటున్నాయి కోళ్లు.
కోడిపందాల దగ్గర మద్యం అమ్మకాలు విచ్చలవిడిగా జరుగుతున్నాయి. పందెం బరులు చూస్తుంటే జాతరను తలపిస్తున్నాయి. సంక్రాంతి పండుగ మూడు రోజులు ఇదే సందడి కొనసాగనుంది. బ‌రుల దగ్గర ఎక్కడా కోవిడ్ నిబంధ‌న‌లు పాటించడం లేదు. చాలామంది మాస్కులు లేకుండానే తిరుగుతున్నారు. సోష‌ల్ డిస్టెన్స్ అనే పదాన్నే మర్చిపోయారు.
భీమ‌వ‌రం, ఉండి, వెంప, త‌ణుకు, దెందులూరు, రావుల‌పాలెం, అమ‌లాపురంలో భారీగా బరులు ఏర్పాటు చేసి కోడి పందాలు నిర్వహిస్తున్నారు. అలాగే రామ‌చంద్రాపురం, ముమ్మిడివ‌రం, కాకినాడ, రాజోలు, ఐ.పోలవరం, రాజాన‌గ‌రంలోనూ పందాలు కొన‌సాగుతున్నాయి.
అనపర్తిలో స్థానిక ఎమ్మెల్యే సత్తి సూర్యనారాయణ రెడ్డి స్వయంగా కోడి పందాలను రిబ్బన్ కట్ చేసి మొదలుపెట్టారు. కాకినాడ రూరల్‌ లో స్థానిక మంత్రి మద్దతుతో యథేచ్ఛగా పందాలు జరుగుతున్నాయి. కాట్రానికోనలో రాష్ట్ర స్థాయి పందాలు భారీ ఏర్పాట్ల మధ్య మొదలయ్యాయి. కోట్ల రూపాయలు చేతులు మారుతున్నా పోలీసులు మాత్రం పట్టించుకోవడం లేదని పలువురు ఆరోపిస్తున్నారు.
