రాష్ట్రపతి ద్రౌపది ముర్ము యాదాద్రి శ్రీ లక్ష్మీ నరసింహస్వామిని దర్శించుకున్నారు. ప్రత్యేక హెలికాప్టర్ లో యాదాద్రికి చేరుకున్న రాష్ట్రపతికి మంత్రులు జగదీష్ రెడ్డి, ఇంద్రకరణ్ రెడ్డి, సత్యవతి రాథోడ్, విప్ సునీత, ఆలయ ఈవో గీతారెడ్డిలు ప్రత్యేకంగా స్వాగతం పలికారు.
రాష్ట్రపతితో పాటు గవర్నర్ తమిళి సై సౌందరరాజన్ యాదాద్రికి వచ్చారు. ఆలయ పునర్నిర్మాణమయ్యాక మొదటి సారిగా వచ్చిన రాష్ట్రపతి ద్రౌపది ముర్ముకు మంగళవాద్యాలు,పూర్ణకుంభంతో ఆలయ అర్చకులు స్వాగతం పలికారు. స్వామివారి గర్బాలయంలో రాష్ట్రపతి ప్రత్యేక పూజలు చేశారు. యాదాద్రి లక్ష్మీనరసింహస్వామి స్వయంభువును రాష్ట్రపతి దర్శించుకున్నారు.
సంకల్పం,సువర్ణపుష్పార్చన పూజల అనంతరం ఆలయ పండితులు చతుర్వేద ఆశీర్వచనం అందజేశారు. స్వామివారి ప్రసాదాన్ని రాష్ట్రపతి ముర్ముకు అందజేశారు. తరువాత ప్రధాన ఆలయ పరిసరాలను రాష్ట్రపతి పరిశీలించారు. అధికారులు ఆలయ విశిష్టత ఆమెకు వివరించారు. దర్శనం తరువాత రాష్ట్రపతి హెలిప్యాడ్ వద్దకు చేరుకొని తిరుగు పయనమయ్యారు.