ఒక నటితో ప్రేమ పెళ్లి బంధం కోసం ఏకంగా రాచరికానికే దూరమైన ప్రిన్స్‌ హ్యారీ గతంలో జరిగిన కొన్ని సంచలన విషయాలను బయటపెట్టారు. తన భార్య కోసం తన అన్న నాతో గొడవ పడ్డాడని తెలిపారు. అది భౌతిక దాడికి సైతం దారి తీసిందని వివరించారు. తన స్వీయ జీవిత చరిత్ర పుస్తకం ‘స్పేర్‌’లో హ్యారీ ఈ సంచలన విషయాలను బయటపెట్టారు.
జనవరి 10న స్పేర్‌ పుస్తకాన్ని హ్యారి ఆవిష్కరించనున్నారు. ఈ లోగా ఈ పుస్తకంలోని కొన్ని కీలక అంశాలతో ది గార్డియన్‌ పత్రిక ప్రత్యేక కథనాన్ని ప్రచురించింది. 2019లో ఈ ఘటన జరిగినట్లు హ్యారీ తన పుస్తకంలో పేర్కొన్నారు. లండన్‌ లోని మా ఇంట్లో మేఘన్‌ గురించి నాకు , విలియం మధ్య వాగ్వాదం మొదలైంది. ఆమె మొరటు మనిషి అని విలియం ఆరోపించాడు. నాకు కోపం వచ్చింది. మీడియా చెప్పిందే గుడ్డిగా నమ్ముతున్నావా? అని అరిచాను.
ఆ వాగ్వాదం కాస్తా తీవ్రంగా మారింది. విలియం నా కాలర్‌ పట్టుకొని లాగి.. నేలపైకి తోసేశాడు. దీంతో నేను శునకానికి ఆహారం వేసే గిన్నె పై పడిపోయాను. దీంతో ఆ గిన్నె విరిగి ఆ ముక్కలు నా వెన్నుకు గుచ్చుకున్నాయి.ఇదంతా క్షణాల్లో జరిగింది. కిందపడ్డ నన్ను కనీసం పైకి లేపలేదు. నేను లేచి విలియంను వెళ్లిపొమ్మని అరిచాను.
విలియం బయటకు వెళ్తూ.. ఇదంతా మేఘన్‌ కు చెప్పాల్సిన అవసరం లేదు అని అన్నాడు. నేను కూడా వెంటనే ఈ విషయాలన్నీ మేఘన్‌ కు చెప్పలేదు. కానీ, ఆ తర్వాత నా గాయాలను చూసి ఆమెకు ఏం జరిగిందో చెప్పమని బలవంతం చేసింది. అదంతా విని ఆమె ఆశ్చర్యపోలేదు కానీ చాలా బాధపడింది. అని హ్యారీ తన గతాన్ని గుర్తు చేసుకున్నారు.
ఇటీవల యూకే, అమెరికాలోని కొన్ని మీడియా ఛానళ్లకు హ్యారీ ప్రత్యేక ఇంటర్వ్యూలు ఇచ్చారు. అవి కూడా ఈ పుస్తకం ఆవిష్కరణకు రెండు రోజుల ముందు ప్రసారం కానున్నాయి. అందులోనూ ఆయన పలు సంచలన విషయాలను పంచుకున్నారు. తనకో మంచి కుటుంబం కావాలని, సంస్థ కాదని హ్యారీ చెప్పారు. రాజీ పడేందుకు నేను సిద్ధమే.. కానీ నా కుటుంబం ముందుకు రావాట్లేదు. నా తండ్రి, సోదరుడితో ఎప్పటిలాగే కలిసి ఉండాలని నేను ఆశపడుతున్నా అని హ్యారీ ఆ ఇంటర్వ్యూల్లో తెలిపారు.
అమెరికా నటి అయిన మేఘన్‌ మెర్కెల్‌ ను హ్యారీ 2018లో ప్రేమ వివాహం చేసుకున్నారు. ముందు నుంచి మేఘన్‌ విషయంలో రాజకుటుంబం లో విభేదాలున్నాయి. పెళ్లి తరువాత ఇవి మరింత తీవ్రమవడంతో 2020లో హ్యారీ -మేఘన్‌ దంపతులు రాచరిక విధులను వదులుకొని అమెరికాలో స్థిరపడ్డారు. గతేడాది తన నానమ్మ ఎలిజబెత్‌ 2 మరణించడంతో లండన్‌ వచ్చిన హ్యారీ దంపతులు అంతిమ సంస్కారాల్లో పాల్గొన్నారు.