రష్యా, అమెరికా అధ్యక్షులు పుతిన్, జోబైడెన్, రాజు ఛార్లెస్ ..ముగ్గురూ మహారాష్ట్ర మాజీ సీఎం ఉద్ధవ్ థాక్రే గురించే చర్చించుకున్నారని శివసేన నేత సంజయ్ రౌత్ వ్యాఖ్యానించారు. వారు వీడియో కాన్ఫరెన్స్ నిర్వహించి థాక్రేపై చర్చించడమే గాక.. మహారాష్ట్రలో సీఎం ఏక్ నాథ్ షిండే ప్రభుత్వం మీద ఆయన ఎలా పోరాడుతున్నారో తెలుసుకుని ఆశ్చర్యపోయారని రౌత్ అన్నారు. ఈ ‘సరికొత్త’ విపరీత వ్యాఖ్యల్లో ఆయన.. ఉక్రెయిన్ అధ్యక్షుడు జెలెన్స్కీని కూడా లాగారు.
థాక్రే గురించి ఆయన కూడా వాకబు చేశారని, థాక్రేని ప్రధాని మోడీ తమకెందుకు పరిచయం చేయలేదని ప్రశ్నించారని రౌత్ చెప్పారు. నాగ పూర్ లో జరిగిన ఓ కార్యక్రమంలో ఈ శివసేన ఎంపీ ఇలా వ్యంగ్యోక్తులతో కార్యక్రమాన్ని రక్తి కట్టించారు. .
‘మోడీ చేతుల్లో ఓటమిని అంగీకరించడానికి నిరాకరించిన ఆ థాక్రే ఎవరు ? థాక్రే తిరిగి మహారాష్ట్ర ముఖ్యమంత్రిగా చేసే ప్రమాణ స్వీకార కార్యక్రమానికి జోబైడెన్ హాజరవుతారు.’. అని కూడా పేర్కొన్నారు. రౌత్ చేసిన ఈ సరదా ప్రసంగమంతా సీఎం ఏక్ నాథ్ షిండేని ఉద్దేశించే .!. ఇటీవల షిండే నాగపూర్ లోనే జరిగిన ఈవెంట్ లో మాట్లాడుతూ.. తన గురించి అమెరికా మాజీ అధ్యక్షుడు బిల్ క్లింటన్ ఓ వ్యక్తి ద్వారా వాకబు చేశారని, తాను ఎలా పని చేస్తానని, ఎలా తింటానని, ఎలా నిద్ర పోతానని అన్నీ అడిగి తెలుసుకున్నారని చెప్పారు. ఆ సందర్భాన్ని సంజయ్ రౌత్ గుర్తుకు తెస్తూ ఈ వ్యాఖ్యలు చేశారు.
మహారాష్ట్ర-కర్ణాటక మధ్య సరిహద్దుల వివాదంపై ఉద్ధవ్, షిండే ఎలా స్పందిస్తున్నారో ..వివరిస్తూ ఆయన.. ఈ సెటైర్లు వేశారు. ఈ వీడియో సోషల్ మీడియాలో వైరల్ అవుతోంది. రౌత్ సరదా కామెంట్లను బీజేపీలో కొందరు కార్యకర్తలు ప్రశంసిస్తుంటే .. రాహుల్ గాంధీ కామిక్ వ్యాఖ్యలు బాగున్నాయా లేక ఈ కామెంట్స్ బాగున్నాయా అంటూ మరికొంతమంది పోల్చుకుంటున్నారు. ఇంతకీ ఇదంతా కపిల్ శర్మ సరదా ‘షో’ లో సంగతి ! ఇందులో సీరియస్ కాంపిటీషన్ ఉందని బీజేపీ నేత ప్రీతి గాంధీ ట్వీట్ చేశారు.