ఉక్రెయిన్ పై రెండోరోజు కూడా బాంబుల వర్షం కురిపించింది రష్యా. రాజధాని కీవ్ పై విరుచుకుపడింది. భారీ పేలుళ్లతో నగరం అట్టుడుకుతోంది. బెలారస్ వైపు నుంచి ఉక్రెయిన్ లోకి సైనిక బలగాలను పంపుతోంది రష్యా. సైనిక స్థావరాలు, ఆయుధాగారాలపై క్షిపణులతో దాడులు చేస్తోంది. చెర్నోబిల్ అణు విద్యుత్ కేంద్రాన్ని తమ అధీనంలోకి తీసుకుంది.
నల్ల సముద్రంలోని స్నేక్ ద్వీపాన్ని రష్యా దళాలు స్వాధీనం చేసుకున్నాయి. అక్కడ 13 మంది ఉక్రెయిన్ బోర్డర్ గార్డ్స్ లొంగిపోయేందుకు నిరాకరించడంతో వారిని చంపేశారు. ఈ క్రమంలోనే రష్యా తక్షణమే ఆక్రమణలు ఆపి చర్చలకు రావాలని కోరారు ఉక్రెయిన్ అధ్యక్షుడు. దాడులు ఆపేంతవరకు తాము పోరాడుతూనే ఉంటామని చెప్పారు. తాము కూడా చర్చలకు సిద్ధమని.. అయితే.. ఉక్రెయిన్ సైన్యం పోరాటం ఆపితేనే తాము సంప్రదింపులు జరుపుతామని తేల్చిచెప్పారు రష్యా విదేశాంగ మంత్రి సెర్జీ లావ్రొవ్.
రెండోరోజు ఇరు దేశాల మధ్య భీకర పోరు కొనసాగింది. రష్యా సైన్యం దాడులను ఉక్రెయిన్ బలగాలు తీవ్రంగా ప్రతిఘటించాయి. రాజధాని కీవ్ కు సమీపంలోని కీలకమైన విమానాశ్రయాన్ని హస్తగతం చేసుకున్నట్లు రష్యా ప్రకటించగా.. ఇప్పటివరకు రష్యాకు చెందిన వెయ్యి మందికిపైగా సైనికులను హతమార్చినట్లు ఉక్రెయిన్ రక్షణ శాఖ ప్రకటన విడుదల చేసింది.
కీవ్ నగరంలోకి ప్రవేశిస్తున్న రష్యా యుద్ధ విమానాన్ని ఉక్రెయిన్ బలగాలు కూల్చివేశాయి. అయితే అది ఓ అపార్ట్మెంట్ వైపు దూసుకెళ్లడంతో మంటలు వ్యాపించాయి. పలువురు గాయపడ్డారు. ఇటు రష్యా సైనిక చర్యపై ఆందోళన వ్యక్తం చేశారు పోప్ ఫ్రాన్సిస్. రోమ్ లోని రష్యన్ రాయబార కార్యాలయానికి వెళ్లి నిరసన తెలియజేశారు.
పుతిన్ తో చైనా అధ్యక్షుడు జిన్ పింగ్ మాట్లాడారు. ఉక్రెయిన్ తో సమస్యను చర్చల ద్వారా పరిష్కరించుకోవాలని సూచించినట్లు అంతర్జాతీయ మీడియా కథనాలు ఇస్తోంది. భారత ప్రధాని మోడీ కూడా ఉక్రెయిన్ లో నెలకొన్న హింసకు ముగింపు పలకాలని పుతిన్ ను కోరారు. సమస్యను దౌత్యపరమైన చర్చల ద్వారా పరిష్కరించుకోవాలని సూచించారు.
మరోవైపు ఉక్రెయిన్ లో చిక్కుకుపోయిన 16వేల మంది భారతీయుల తరలింపుపై కేంద్రం కీలక ఆదేశాలు జారీ చేసింది. అక్కడి వారిని సుర‌క్షితంగా రొమేనియా, హంగేరీ సరిహద్దుల నుంచి బ‌య‌ట‌కు తీసుకొచ్చేందుకు చూస్తోంది. దీనికోసం కొన్ని బృందాలను రొమేనియా సరిహద్దు ప్రాంత‌మైన పొరుబ్నే-సీరెత్ వ‌ద్ద, హంగేరీ సరిహద్దు ప్రాంత‌మైన చోప్ జొహోనీ దగ్గర ఉంచింది. విమానాల ఖర్చును కూడా ప్రభుత్వమే భరించనున్నట్లు అధికార వర్గాలు తెలిపాయి. ఉక్రెయిన్ లో ఉన్న భారతీయులు.. ఆయా సరిహద్దుల చెక్ పాయింట్ల దగ్గర భారత బృందాలను సంప్రదించాలని చెప్పాయి. విదేశాంగ శాఖ బృందాల సమన్వయంతో సరిహ్దదులు దాటాలని స్పష్టం చేశాయి.