విప్ వద్దు… గిప్ వద్దు…

హైదరాబాద్: కేబినెట్ విస్తరణలో తనకు మంత్రి పదవి వస్తుందని గాంధీ చాలా ఆశలు పెట్టుకున్నారు. చివరికి విప్ పదవితో కేసీఆర్ సరిపెట్టడంతో తీవ్రంగా కలత చెందిన గాంధీ తన గన్‌మెన్‌లను సరెండర్‌ చేసి వెళ్లిపోయారు. తన సామాజికవర్గంలో తానే ప్రముఖుడిని అయినా తన కంటే జూనియర్‌కు అవకాశం ఇచ్చారని సన్నిహితుల దగ్గర గాంధీ తన అసంతృప్తిని వెలిబుచ్చారని సమాచారం. ఇలావుంటే, గాంధీ నేరుగా ప్రగతి భవన్‌కు వెళ్లి అక్కడ కేసీఆర్‌ను కలిసినట్టు సమాచారం. వెళ్లడం వెళ్లడమే ‘నాకు విప్ వద్దు..’ అని ఒకే ఒక మాట చెప్పి వెంటనే బయల్దేరి వచ్చేసినట్టు చెబుతున్నారు.
తెలంగాణ కేబినెట్ విస్తరణలో మంత్రి పదవి రాకపోవడంతో గాంధీలాగే చాలా మంది కీలక నేతలు తీవ్ర అసంతృప్తికి లోనవుతున్నారు. కచ్చితంగా తమకు మంత్రి పదవి దక్కుతుందని భావించిన నేతల ఆశలన్నీఆవిరయ్యాయి. దీంతో అసంతృప్తి ఉన్న నేతలను బుజ్జగించే పనిలో అధిష్టానం నిమగ్నమైంది. పార్టీకి విధేయులుగా ఉంటామని టీఆర్ఎస్ నేతలు బాజిరెడ్డి, రాజయ్య, జూపల్లి కృష్ణారావు చెప్పినట్టుగా అనుకూల మీడియాలో ప్రచారం జరుగుతోంది. మరోవైపు ఇప్పటికీ మైనంపల్లి హన్మంతరావు, జోగు రామన్న అందుబాటులోకి రాలేదు.