దర్శకధీరుడు ఎస్ఎస్ రాజమౌళి దర్శకత్వం వహించిన ఆర్‌ఆర్‌ఆర్‌ చిత్రం ప్రపంచవ్యాప్తంగా సంచలనాలకు వేదికగా మారింది. గతేడాది రిలీజైన ఈ చిత్రం థియేట్రికల్‌గా రికార్డు వసూళ్లను సాధించింది. ప్రస్తుతం ప్రపంచవ్యాప్తంగా అనేక అవార్డులను సొంతం చేసుకొంటూ తెలుగు సినిమా పరిశ్రమ ఘనతను ప్రపంచానికి చాటి చెప్పుతున్నది. అయితే తాజాగా ఆర్‌ఆర్‌ఆర్‌ సినిమాను లాస్ ఏంజెలెస్‌లో ప్రదర్శించేందుకు ఏర్పాట్లు చేయగా మరో సంచలనం నమోదు చేసింది. ఆర్‌ఆర్‌ఆర్‌ సినిమా, లాస్ ఎంజెలెస్ అడ్వాన్స్ బుకింగ్ వివరాల్లోకి వెళితే…
ఆర్‌ఆర్‌ఆర్‌ మూవీ థియేట్రికల్‌ రన్‌లో 1000 కోట్లకుపైగా వసూళ్లను సాధించడం, ఆ తర్వాత ఓటీటీలో రికార్డు వ్యూస్‌తో చరిత్ర సృష్టించింది. ఈ సినిమా రిలీజై ఏడాది కావోస్తున్న క్రేజ్ ఏ మాత్రం తగ్గలేదు. ఈ సినిమా ఎప్పటికప్పుడు కొత్త సంచలనాలకు అడ్డగా మారుతున్నది. అవార్డులు, రివార్డుల గెలుచుకొంటూ వినోద రంగంలో దేశ ప్రతిష్టను పెంపొదిస్తున్నది.
ప్రపంచంలోనే అత్యుత్తమ పురస్కారం, సినిమారంగంలో నోబెల్ లాంటి ఆస్కార్ అవార్డులకు భారతదేశం నుంచి నామినేట్ అయ్యే అవకాశం కోల్పోయిన ఈ చిత్రం ప్రత్యేక ఎంట్రీ ద్వారా ఆస్కార్‌కు నామినేట్ అయింది. త్వరలోనే ఆస్కార్ అవార్డుల వేడుకలో సత్తా చాటేందుకు సిద్దమైంది.
ఇదిలా ఉండగా, అమెరికాలో మరో ప్రతిష్టాత్మక అవార్డు గోల్డెన్ గ్లోబ్ అవార్డుల కార్యక్రమానికి ఆర్‌ఆర్‌ఆర్‌ చిత్ర యూనిట్ హజరవుతున్నది. ఇప్పటికే రాజమౌళి, రాంచరణ్, ఉపాసన కొణిదెల, రమా రాజమౌళి, వల్లి, కార్తీకేయ, సినిమా యూనిట్ సభ్యులు లాస్ ఎంజెలెస్‌కు చేరుకొన్నారు. గోల్డెన్ గ్లోబ్ అవార్డుల్లో ఆర్‌ఆర్‌ఆర్‌ మూవీ పలు విభాగాల్లో పోటీ పడుతున్నది.
గోల్డెన్ గ్లోబ్ అవార్డుల కార్యక్రమానికి ముందుగా లాస్ ఎంజెలెస్‌లో ఆర్‌ఆర్‌ఆర్‌ సినిమా స్పెషల్ స్క్రీనింగ్‌ను ఏర్పాటు చేశారు. ఈ సినిమా అడ్వాన్సు బుకింగ్ ఓపెన్ కాగానే.. కేవలం 98 సెకన్లలోనే దాదాపు టికెట్లు అన్నీ అమ్ముడుపోవడం రికార్డుగా మారింది. అంతేకాకుండా ఆన్ లైన్ టికెట్ బుకింగ్ వెబ్‌సైట్ క్రాష్ అవ్వడం సెన్సేషన్‌గా మారింది.
ఆర్‌ఆర్‌ఆర్‌ మూవీని జూన్ 9వ తేదీన లాస్ ఎంజెలెస్‌లోని ఐమాక్స్ థియేటర్‌లో స్పెషల్ షో ప్రదర్శిస్తున్నారు. ఈ సినిమా కోసం టికెట్లు ఆన్‌లైన్‌లో ఓపెన్ చేయగానే 900 టికెట్లు కేవలం 98 సెకన్లలో అమ్ముడుపోయాయి. ఒక్కసారిగా యూజర్లు పోటెత్తడంతో వెబ్‌సైట్ క్రాష్ అయింది అని స్థానికులు తెలిపారు.