సముద్రం అట్టడుగున ఉండే అక్కడి జంతు ప్రపంచం అనేక మిలియన్ల జీవుల రాజ్యం. ముఖ్యంగా సముద్రం అడుగున ఉండే చేపలు ఎన్నో రకాలు, మరెన్నో అద్భుతమైనవి, వింతైనవి కూడా ఉంటాయి. వాటిల్లో కొన్ని చూసేందుకు ఎంతో భయంకరంగా కనిపించేవి కూడా ఉన్నాయి. అలాంటి ఓ భయంకర రూపంతో ఉన్న సముద్రపు అడుగున జీవించే చేప ఫోటో ఒకటి నెట్టింట్లో వైరల్ అవుతోంది. అది చూసిన నెటిజన్లు భిన్నమైన కామెంట్లు పెడుతున్నారు.
ర‌ష్యాకు చెందిన ఒక మత్స్యకారుడు తాను పట్టుకున్న చేప ఫోటోను ఇన్‌స్టాగ్రామ్‌లో పోస్ట్ చేశాడు. దానికి “ఫ్రాంకెన్ స్టైయిన్స్ ఫిష్” అనే క్యాప్షన్ తో షేర్ చేయగా.. అది కాస్త నెట్టింట సంచలనం సృష్టిస్తోంది. గత వారంరోజులుగా వైరల్ అవుతున్న ఈ ఫోటోలోని చేప తెల్లని రంగుతో కనిపిస్తోంది. ఆకుపచ్చని కళ్ళు, ఒళ్లంతా బెల్లం రంగు కలిగిన చారికలతో ఉంది.. ఈ వింత చేప తోక కూడా చిరిగిన రెక్కల వలె కనిపిస్తుంది. చేపపై విచిత్రమైన గుర్తులు కూడా ఉన్నాయి.
అలాగే.. మరో చేప ఫోటోను షేర్ చేసిన సదరు మత్స్యాకారుడు.. అది మరింత భయానకంగా కనిపిస్తుండ‌టంతో దానికి వైపర్‌ ఫిష్ గా చెప్తున్నాడు. ఇది రాక్షసిలాంటి నోరు, ఆ నోటిలో ఈటెల్లాంటి పళ్లు. శరీరమేమో పాములా కనిపిస్తుంది.ఇప్పుడు ఈ రెండు ఫోటోలు సోషల్ మీడియాలో వైరల్ అవుతున్నాయి.
వింతచేప ఫోటో చూసిన నెటిజన్లు షాక్‌ అవుతున్నారు. చాలా మంది సోషల్ మీడియా వినియోగదారులు భయపడుతున్నట్టుగా కామెంట్‌ చేస్తున్నారు. ఇలాంటి చేపలు సముద్రంలో లోతుగా ఉండే ప్రదేశంలోనే నివసిస్తాయంటూ కొందరు నెటిజన్లు కామెంట్లు పెడుతున్నారు.
