చిలుక జోశ్యం చెప్పడం చూసాం. చిలుక సాక్ష్యం చెప్పడం చూశారా. ఓ లిక్కర్ మాఫియా ముఠా గురించి చిలుక పోలీసులకు సాక్ష్యంగా నిలిచింది. ఏంటి నమ్మకం కలగటం లేదా! కానీ నమ్మక తప్పదు.
లిక్కర్ మాఫియా గ్యాంగ్ను పట్టుకునేందుకు బిహార్ పోలీసులకు ప్రస్తుతం ఈ చిలుకనే విచారిస్తున్నారు. ఇప్పుడీ వీడియో నెట్టింట వైరల్గా మారింది. వివరాల్లోకి వెళ్తే.. గయాలో లిక్కర్ మాఫియా గ్యాంగ్కు సంబంధించి సమచారం అందుకున్న పోలీసులు.. వారిని పట్టుకునేందుకు ఓ ఇంటికి వెళ్లారు.
అయితే పోలీసులు వెళ్లే సరికి మద్యం వ్యాపారి కుటుంబం మొత్తం అక్కడి నుంచి పరారైంది. కానీ ఆ ఇంట్లో పంజరంలో మిథూ మియాన్ అనే ఓ చిలుక ఉండిపోయింది. ఆ చిలుకకు మనుషుల భాష అర్థం చేసుకోగలుగుతుంది.
దీంతో చిలుకను చూసిన ఇన్స్పెక్టర్ కన్నయ్య దానిని విచారించటం మొదలుపెట్టారు. ‘మీ సార్ ‘అమృత్ మల్లా’ ఎక్కడికి వెళ్లాడు? వాళ్లు పాత్రలో మద్యం తయారు చేశారా?’ అని ఇన్స్పెక్టర్ ప్రశ్నలు అడిగారు. చిలుక ఆయన మాటలు శ్రద్ధగా వింది.
కానీ చిలుక మాత్రం తన యజమానికి విధేయురాలై తెలివిగా ‘కటోరా'(తెలుగులో పాత్ర)అనే పదం తప్ప ఏం చెప్పడం లేదు. మంగళవారం అర్థరాత్రి రాత్రి జరిగిన ఈ చిలుక విచారణ వీడియో సోషల్ మీడియాలో చక్కర్లు కొడుతోంది. ప్రస్తుతం పోలీసులు పరారీలో ఉన్న నిందితులను పట్టుకునే పనిలో ఉన్నారు.