ప్ర‌ముఖ ద‌ర్శ‌కుడు మ‌ధుర్ భండార్క‌ర్ త‌న త‌దుప‌రి చిత్రాన్ని ప్ర‌క‌టించారు. మిల్కీబ్యూటీగా పేరుతెచ్చుకున్న త‌మ‌న్నాతో బ‌బ్లీ బౌన్సర్ అనే బాక్సింగ్ నేప‌థ్యం ఉన్న చిత్రాన్ని ముధ‌ర్ భండార్క‌ర్ తెర‌కెక్కిస్తున్నారు. ఫాక్స్ స్టార్ స్టూడియోస్, జంగ్లీ పిక్చ‌ర్స్ సంయుక్తంగా తెర‌కెక్కిస్తున్న ఈ సినిమాకి సంబంధించిన షూటింగ్ తాజాగా పూజా కార్య‌క్ర‌మాల‌తో మొద‌లైంది.
గ‌తంలో తాను తెర‌కెక్కించిన సినిమాల‌కు భిన్నంగా బ‌బ్లీ బౌన్సర్ ఉండ‌నుంద‌ని, ఈ సంద‌ర్భంగా ద‌ర్శ‌కుడు మ‌ధుర్ భండార్క‌ర్ ప్రకటించాడు. బాక్స‌ర్స్ టౌన్ గా పేరుగాంచిన అసోలా ఫ‌తైపూర్ బ్యాక్ డ్రాప్ లో బాక్సింగ్ నేప‌థ్యంలో ఈ సినిమాను రూపొందనుంది. మిల్కీబ్యూటీ త‌మ‌న్నా ఈ సినిమాలో ఓ మ‌హిళ బౌన్సర్ గా న‌టిస్తున్నార‌ని, భార‌త‌దేశంలో తొలిసారిగా ఓ మ‌హిళ బౌన్సర్ క‌థ ఆధారంగా వ‌స్తున్న తొలి సినిమా ఇదే.
త‌న కెరీర్ లో తొలిసారిగా ఓ బౌన్సర్ పాత్ర‌లో క‌నిపించ‌డం చాలా ఆనందంగా ఉందంటోంది తమన్న. ఓ ఛాలెంజ్ గా తీసుకొని ఈ సినిమాలో నటిస్తానని తెలిపింది. మ‌ధుర్ ద‌ర్శ‌క‌త్వంలో తొలిసారి న‌టించ‌డం చాలా ఉత్కంఠగా ఉందని, కచ్చితంగా ప్రేక్షకులు ఆదరిస్తారని అంటోంది.
ప్రస్తుతం తమన్న కెరీర్ పీక్ స్టేజ్ లో ఉంది. ఓవైపు గ్లామర్ పాత్రలు పోషిస్తూనే, మరోవైపు నటనకు ప్రాధాన్యం ఉన్న క్యారెక్టర్స్ లో కూడా నటిస్తోంది. తెలుగులో ఆమె ఎఫ్3, భోళాశంకర్ సినిమాల్లో నటిస్తోంది. ఆమె నటించిన గుర్తుందా శీతాకాలం విడుదలకు సిద్ధమైంది. అటు ఓటీటీలో కూడా తమన్న లీడ్ రోల్స్ తో దూసుకుపోతోంది.