టాటా గ్రూప్ లో త‌లెత్తిన చైర్మ‌న్ చైర్ వివాదం ఇంకా కొన‌సాగుతూనే ఉంది. వాటాలకు సంబంధించి టాటా సన్స్, షాపూర్‌జీ పల్లోంజీ గ్రూప్ మధ్య వివాదంపై సుప్రీం కోర్టులో తుది వాదనలు కొనసాగుతున్నాయి. హోల్డింగ్‌ సంస్థ అయిన టాటా సన్స్‌లో తమకున్న 18.37 శాతం వాటాలకు బదులుగా టాటా గ్రూప్ లిస్టెడ్‌ కంపెనీల్లో షేర్లను కేటాయించాలంటూ ఎస్‌పీ గ్రూప్ ప్రతిపాదించింది.
కానీ ఈ ప్ర‌తిపాద‌న‌న‌ను టాటా సన్స్ తోసిపుచ్చింది. అందుకు ఒప్పుకుంటే టాటా గ్రూప్‌లో భాగమైన ఇతర లిస్టెడ్‌ కంపెనీల్లో ఎస్‌పీ గ్రూప్ మళ్లీ మైనారిటీ వాటాలు తీసుకున్నట్లవుతుందే తప్ప పెద్ద తేడా ఉండబోదని టాటా సన్స్ స్ప‌ష్టం చేసింది. టాటా సన్స్ తరఫున సీనియర్‌ అడ్వకేట్‌ హరీష్‌ సాల్వే, ఎస్‌పీ గ్రూప్‌నకు సంబంధించిన సైరస్‌ ఇన్వెస్ట్‌మెంట్‌ తరఫున సీనియర్‌ అడ్వకేట్‌ సీఏ సుందరం వాదనలు వినిపించారు. దీనిపై విచారణ సోమవారం కూడా కొనసాగనుంది.
టాటా సన్స్‌తో విభేదాల నేపథ్యంలో అందులో వాటాలు విక్రయించి వైదొలగాలని ఎస్‌పీ గ్రూప్ భావిస్తోంది. అయితే, వాల్యుయేషన్‌ విషయంలో రెండు కంపెనీల మధ్య స‌ఖ్య‌త రావ‌టం లేదు. టాటా సన్స్‌లో తమకున్న 18.37 శాతం వాటాల విలువ 1.75 లక్షల కోట్లుగా ఉంటుందని ఎస్‌పీ గ్రూప్ వాదిస్తుండగా, ఇది కేవలం 70,000-80,000 కోట్ల మధ్య ఉంటుందని టాటా సన్స్ వాదిస్తోంది.
