గుంటూరు: మేఘా సంస్థతో జగన్ ప్రభుత్వం చీకటి ఒప్పందం చేసుకుందని టీడీపీ నేత వైవీబీ రాజేంద్రప్రసాద్ ఆరోపించారు. ఇతర కాంట్రాక్టర్లు ముందుకు రాకుండా ప్రభుత్వం బెదిరించిందని వైవీబీ విజయవాడలో మాట్లాడుతూ తీవ్ర ఆరోపణ చేశారు. జలవనరుల మంత్రి వాస్తవాలు తెలుసుకొని మాట్లాడాలని అన్నారు. పోలవరం రివర్స్‌ టెండరింగ్‌ కాదు.. రిజర్వ్‌ టెండరింగ్‌ అని విమర్శించారు. మ్యాక్స్‌ ఇన్‌ఫ్రా, మెఘా కంపెనీలకు అర్హతలేదన్నారని… కాంట్రాక్టు ఎలా ఇస్తారని గతంలో ఇదే వైసీపీ నేతలు విమర్శించారని రాజేంద్రప్రసాద్ వెల్లడించారు.జగన్ ఏపీని తీసుకువెళ్లి కేసీఆర్‌ చేతిలో పెడుతున్నారని టీడీపీ మరో సీనియర్ నేత జీవీ ఆంజనేయులు ఆరోపించారు. ఏపీలో ప్రాజెక్టులను వదిలేసి తెలంగాణలో ప్రాజెక్టులు కట్టాలనుకోవడం దుర్మార్గమన్నారు. కేసీఆర్‌ డైరెక్షన్‌లో పనిచేస్తూ రాష్ట్రానికి అన్యాయం చేస్తున్నారని జీవీ ఆంజనేయులు విమర్శించారు.
