తిరుమల శ్రీవారి ఆలయం డ్రోన్ వీడియో వ్యవహారం సంచలనంగా మారింది. సోషల్ మీడియాలో వీడియో వైరల్ కావడంతో టీటీడీ అధికారులు ఉలిక్కిపడ్డారు. వెంటనే రంగంలోకి దిగిన టీటీడీ, సెక్యూరిటీ అధికారులు.. ఆ విజువల్స్‌ని ఫోరెన్సిక్ ల్యాబ్‌కి పంపేందుకు సిద్ధమవుతున్నారు. యూట్యూబ్ ఛానెల్ నిర్వాహకులపై విచారణకు ఆదేశించినట్టుగా సమాచారం. అలాగే ఈ వీడియో ఇటీవల తీసింది కాదని.. పాత వీడియో కావొచ్చు అంటున్నారు.
ఈ వీడియో ఇటీవల తీసిందా.. లేకపోతే గతంలోదా అనేది క్లారిటీ లేదు. వీడియో ఎప్పుడు తీసినా శ్రీవారి ఆలయాన్ని డ్రోన్ కెమెరాల సహాయంతో ఏరియల్ వ్యూలో చిత్రీకరించడం నిషేధం కాబట్టి విమర్శలు వస్తున్నాయి. ఈ వీడియో ఎప్పటిదైనా సరే నేరమే.. అందుకే సోషల్ మీడియాలో పోస్టుచేసిన వారిపై.. యూట్యూబ్ ఛానెళ్లలో పెట్టినవారిపై చర్యలు తీసుకునేందుకు టీటీడీ సిద్ధమవుతున్నట్లు సమాచారం అందుతోంది. అలాగే ఆ వీడియో ఫేక్ అని చెబుతున్నారు.
ప్రధాన ఆలయం, ఆ చుట్టుపక్కల భద్రతా వలయంలో ఉంటుందని.. కాబట్టి డ్రోన్ కెమెరాతో బంధించడం సాధ్యం కాదంటున్నారు. ఫోరెన్సిక్ ల్యాబ్ రిపోర్ట్ వచ్చిన తర్వాత తప్పు చేసిన వ్యక్తులపై చట్టపరంగా చర్యలు తప్పవంటున్నారు. ఇటు ఇన్ స్టాలో విజువల్స్ పోస్ట్ చేసిన వ్యక్తిని అదుపులోకి తీసుకునే ప్రయత్నంలో ఉన్నట్లు తెలుస్తోంది. ఆ వీడియోను తీసింది హైదరాబాద్‌కు చెందిన వ్యక్తిగా చెబుతున్నారు.
అలాగే ఈ వీడియో త్రీడీ ఇమేజ్, గూగుల్ లైవ్ వీడియో అయ్యి ఉండొచ్చనే అభిప్రాయాలు వ్యక్తమవుతున్నాయి. ఈ వీడియోను తెరపైకి తీసుకొచ్చి టీటీడీపై బురదజల్లే ప్రయత్నం చేస్తున్నారని చర్చ జరుగుతోంది. పాత వీడియోను పట్టుకుని ఇప్పుడు జరిగిందని ప్రచారం చేస్తున్నారనే అభిప్రాయాలు వ్యక్తమవుతున్నాయి. త్వరలోనే ఈ అంశాలపై క్లారిటీ వస్తుందని భావిస్తున్నారు. మొత్తం మీద శ్రీవారి ఆలయం వీడియో ఇప్పుడు హాట్ టాపిక్ అయ్యింది.
తిరుమల శ్రీవారు కొలువైన కొండపైన ‘నో ఫ్లై జోన్’గా ఉంది. ఆ కొండ పైనుంచి విమానాలు, హెలికాప్టర్లకు ఎగిరేందుకు అనుమతి ఉండదు. ఆగమశాస్త్రం ప్రకారం కూడా శ్రీవారి ఆలయంపై ఎలాంటి వస్తువులు ఎగరడానికి అనుమతి లేదు. అయితే ఉన్నట్టుండి తిరుమల దేవాలయానికి సంబంధించిన డ్రోన్ వీడియో సోషల్ మీడియాలో కనిపించింది. కట్టుదిట్టమైన భద్రత ఉండే చోట ఈ వీడియో ఎలా రికార్డ్ చేశారన్నది మిస్టరీగా మారింది.
తిరుమల వెంకటేశ్వర స్వామి ఆలయ డ్రోన్ షాట్స్.. ఇన్‌స్టాగ్రామ్ అకౌంట్‌లో వైరల్ కావడంతో ఈ విషయం బయటకు వచ్చింది. ఐకాన్ అనే అకౌంట్ నుంచి ఈ వీడియో అప్‌లోడ్ అయినట్లు గుర్తించారు అధికారులు. గత ఏడాది నవంబర్‌లో ఈ వీడియోను అప్‌లోడ్ చేసినట్లు చెబుతున్నారు. పూర్తి వివరాలు తెలియాల్సి ఉంది.