ఇంటర్నెట్లో చైల్డ్ పోర్నోగ్రఫీ సెర్చ్ చేస్తున్నారా.. అయితే జాగ్ర‌త్త. ఏదో రోజు హ‌ఠాత్తుగా మీ ఇంటి ముందు పోలీసులు ప్ర‌త్య‌క్షం కావ‌వ‌చ్చు. అవును.. చైల్డ్ పోర్నోగ్రఫీ వెతికేవారిపై నేషనల్ క్రైమ్ రికార్డ్స్ బ్యూరో నిత్యం క‌న్నేసి ఉంచుతోంది. ఇంటర్నెట్లో చైల్డ్ పోర్నోగ్రఫీ గురించి అధికంగా సెర్చ్ చేసిన హైద‌రాబాద్‌కు చెందిన ఇద్ద‌రు వ్య‌క్తులు తాజాగా క‌ట‌క‌టాల‌పాల‌య్యారు. హైదరాబాద్‌ సైబర్‌ క్రైం పోలీసులు వారిని అరెస్ట్ చేశారు.
తార్నాకకు చెందిన మహమ్మద్‌ ఫిరోజ్.., కాచిగూడకు చెందిన ప్రశాంత్‌ కుమార్‌.. అనే ఇద్ద‌రు వ్య‌క్తులు 2019లో చైల్డ్ పోర్నోగ్ర‌ఫీకి సంబంధించిన ఫోటోలు, వీడియోలు ఇంట‌ర్‌నెట్‌లోకి అప్‌లోడ్‌ చేసినట్టు నేషనల్ క్రైం రికార్డ్‌ బ్యూరో (ఎన్‌సీఆర్‌బీ) గుర్తించింది. వీరితో మరో 13 మంది వివరాలను తెలంగాణ సీఐడీకి పంపించింది. ఈ మేర‌కు సీఐడీ అధికారులు.. ఆ వివరాలను జిల్లాల పోలీసులకు పంపారు
ప్రపంచ వ్యాప్తంగా చైల్డ్ పోర్నోగ్రఫీపై నిషేధం ఉంది. ఇంటర్నెట్లో దీని గురించి ఎవరు సెర్చ్ చేసినా, ఫోటోలు, వీడియోలు అప్‌లోడ్‌ చేసినా.. ఆ వివ‌రాలు నేషనల్ క్రైం రికార్డ్‌ బ్యూరోలో రిజిస్ట‌ర్ అవుతాయి. చైల్డ్ పోర్నోగ్ర‌ఫి కింద అరెస్ట‌యితే క‌ఠిన చ‌ర్య‌లు ఉంటాయి.
