ఐదేండ్లలో ఎన్ కౌంటర్లపై కేంద్రం చెప్పిన వివరాలివే

దేశ వ్యాప్తంగా గడిచిన ఐదేండ్లలో 655 ఎన్ కౌంటర్లు చోటు చేసుకున్నట్లు కేంద్రం వెల్లడించింది. 2017 నుంచి ఇప్పటి వరకు ఎన్ని ఎన్ కౌంటర్లు జరిగాయన్న బీజేపీ ఎంపీ వరుణ్ గాంధీ ప్రశ్నకు బదులుగా కేంద్రం వివరాలు వెల్లడించింది. ఈ మేరకు పార్లమెంట్ లో హోం శాఖ సహాయ మంత్రి నిత్యానంద్ రాయ్ బదులిచ్చారు.

గడిచిన ఐదేండ్లలో దేశంలో అత్యధికంగా ఉత్తరప్రదేశ్ లో 117 ఎన్ కౌంటర్లు జరిగాయని ఆయన వెల్లడించారు. అసోం(50)లతో రెండో స్థానంలో నిలిచిందని చెప్పారు. ఆ తర్వాత స్థానాల్లో జార్ఖండ్ (49), ఒడిశా (36), జమ్ము కశ్మీర్ (35), మహారాష్ట్ర (26), బిహార్ (22), హర్యానా (15 ) తమిళనాడు (14) ఉన్నాయని వివరించారు.

ఇక తెలుగు రాష్ట్రాల్లో తెలంగాణలో 13, ఆంధ్రప్రదేశ్ లో 9 ఎన్ కౌంటర్లు చోటు చేసుకున్నట్టు తెలిపారు. మధ్యప్రదేశ్ , అరుణాచల్ ప్రదేశ్ లల్లో 9 ఎన్ కౌంటర్లు, మేఘాలయా (9) , రాజస్థాన్, ఢిల్లీలో8 చొప్పున ఉన్నాయన్నారు.

“ఎన్‌కౌంటర్ హత్యలు” ఆరోపణలపై పోలీసు అధికారులపై కొనసాగుతున్న విచారణలు, అలాంటి కేసుల్లో దోషులుగా తేలిన అధికారుల సంఖ్యపై వివరాలు తెలపాలని గాంధీ అడిగారు. దీనిపై స్పందించిన కేంద్ర సహాయ మంత్రి … పోలీసులు, శాంతి భద్రతలు రాష్ట్ర అంశాలని అందువల్ల తాము అలాంటి రికార్డులేవి నిర్వహించట్లేదని తెలిపారు.