కన్నప్ప శివ్వయ్యకు వేటమాంసం నైవేద్యం పెట్టాడ. మహాకాళేశ్వర్ లో జంగమయ్యకు మద్యం సమర్పించుకుంటారట.అదే విధంగా గుజరాత్లోని సూరత్లో దేవుడికి సిగరెట్ నైవేద్యంగా ఇస్తారట.
ఏంటి దేవుడు సిగరెట్ కాల్చడమేంటి అనుకుంటున్నారా…అదేంటి..?! దేవుడు మాంసం తినొచ్చు..మందుకొట్టొచ్చు సిగరెట్ కాలిస్తే తప్పొచ్చిందా..!? కటౌట్ చూసి కొన్ని కొన్ని నమ్మెయ్యాలి డ్యూడ్.!
తప్పేలేదు.! ఊరికో దేవుడు. మంచి చేయమని వేడుకునే జీవుడు.ఇద్దరి మధ్యా విశ్వాసాల వినుమయం. వెరసి…ఆ ఊరి దేవుడి ప్రత్యేకత. సూరత్లోని అథ్వాలిన్స్ ప్రాంతంలోని ఆదర్శ్ సొసైటీలో వంజారా భూత్మామ అనే చిన్న ఆలయం ఉంది.
ఈ ఆలయం చూడటానికి చిన్నగా ఉంటుంది కానీ, భక్తులకు ఇక్కడి దేవుడిపై అపారమైన నమ్మకం. ఆ కథలోకి వెళితే..130 ఏళ్ల క్రితం ఇక్కడ అకాల పరిస్థితి ఏర్పడింది. అప్పట్లో వంజరుల సమూహం ఇక్కడ నివసించేవారు. ఆ సమయంలో ఒక వంజర మరణించాడు.
అతని సమాధిని ఇక్కడ నిర్మించారు. అప్పటి నుంచి ఈ ప్రదేశాన్ని వంజర భూత్మామ అని పిలుస్తారు.క్రమంగా ఇక్కడ వంజారా భూత్మామ ఆలయం ఏర్పాటైంది. 130 సంవత్సరాల నాటి ఒక చెట్టు సైతం ఆ ఆలయ సమీపంలో ఉంది.
ఇక్కడే భక్తులు సిగరెట్లు వెలిగించి దైవాన్ని కొలుస్తున్నారు. ఇలా చేస్తే.. భక్తుల కోరికలు తీరుతాయని స్థానికుల నమ్మకం. సిగరెట్లే కాకుండా మగాస్ అనే మిఠాయిలు కూడా భూత్మామకు నైవేద్యంగా పెడతారు.
మాగాస్ స్వీట్లను సమర్పిస్తే.. చేస్తున్న పనిలో ఏకాగ్రత ఉంటుందని ప్రజలు నమ్ముతారు.మాగాస్ స్వీట్లను తమ దగ్గర పెట్టుకుంటే వారికి మంచి ఉద్యోగం వస్తుందని కూడా విశ్వసిస్తారు.
ఈ స్వీట్ గురించి చాలా తక్కువ మంది విని ఉంటారు. ఎందుకంటే, ఇది ప్రత్యేక సందర్భాలలో మాత్రమే తినే స్వీట్. ఇది శెనగపిండి, డ్రై ఫ్రూట్స్, చక్కెరతో చేసిన స్వీట్.
‘ఆదివారాల్లో భక్తులు అధికంగా ఆలయానికి వచ్చి సిగరెట్లను నైవేద్యంగా పెడుతుంటారు. ప్రతి సంవత్సరం అందరికీ భోజనాలను పెడుతుంటాం. దీనికోసం 15వేల మందికి పైగా భక్తులు వస్తారు. ఇదే మన కుల దైవం అంటూ మా తాత ప్రాణాలు విడిచారు.
ఎవరికి ఏ సమస్య వచ్చినా తీర్చేవారు. సమాజంలో ఎలాంటి సమస్యలు రావొద్దని దైవానికి సేవ చేస్తుంటాం. గత 14-15 సంవత్సరాలుగా భూత్మామ జన్మదిన వేడుకలు జరుపుకుంటున్నాం.
ఈ వేడుకలకు గుజరాత్ నుంచి మాత్రమే కాకుండా ముంబయి, ఉత్తర గుజరాత్, సౌరాష్ట్ర నుంచి కూడా భక్తులు వస్తుంటార’ని అశోక్భాయ్ తెలిపారు. భూత్మామ ముందు సిగరెట్ వెలిగించిన తర్వాత దానిని తన నోటి దగ్గర 3సార్లు ఉంచి తీసేస్తారు.
సిగరెట్ను గుడి పక్కన ఉన్న కుందులో ఉంచుతారు. కాల్చిన సిగరెట్లను గుడిలో పడేయకుండా, పరిసరాలను కలుషితం చేయకూడదనే ఉద్దేశంతో వాటిని బయట పడేస్తారు. సిగరెట్ కాల్చడం ద్వారా కోరికలు నెరవేరుతాయని భక్తుడు యతిన్ పటేల్ అన్నారు.
‘నేను చాలా సంవత్సరాలుగా సిగరెట్లను నైవేద్యంగా సమర్పిస్తున్నాను. దీపం నుంచి సిగరెట్ వెలిగించి, మామదేవ్ నోటి దగ్గర మూడు సార్లు ఉంచుతార’ని అతడు చెప్పుకొచ్చాడు.