అత్యాచార ఆరోపణలతో జైలుకెళ్లిన ఓ యువకుడు.. అదే బాధితురాలిని పెళ్లి చేసుకోడానికి 4 గంటల పాటు పెరోల్‌పై విడుదలయ్యాడు. ఈ చిత్రమైన ఘటన బిహార్‌లోని గోపాల్గంజ్ జిల్లా మాచర్‌గావ్ గ్రామంలో చోటుచేసుకుంది. వివరాల్లోకి వెళ్తే.. బిహార్‌లోని చెందిన రాహుల్ కుమార్ హాజీపుర్‌లో ఇంజినీరింగ్‌ చదివాడు. ఉత్తర్‌ ప్రదేశ్‌‌లోని కప్తాగంజ్‌కు చెందిన బాధిత అమ్మాయితో అతడికి పరిచయం ఏర్పడింది. కుటుంబంతో కలిసి జనవరిలో సత్సంగ్‌కు వెళ్లినప్పుడు ఇరువురూ కలుసుకున్నారు. ఈ సమయంలో ఏర్పడిన పరిచయం స్నేహంగా మారి ప్రేమకు దారితీయడంతో పెళ్లి చేసుకోవాలని నిర్ణయించుకున్నారు.
ఈ క్రమంలో మార్చి 4న వీరు గోపాల్‌గంజ్‌లోని ఓ ఆలయానికి వెళ్లారు. రోజంతా చుట్టుపక్కల ప్రాంతంలో తిరిగిన ప్రేమ జంట.. ఆ రాత్రి రాహుల్ కుమార్ స్నేహితుని ఇంటికి వెళ్లిందిరు. ఆ రోజు రాత్రి జరిగిన ఘటనతో యువతి అస్వస్థతకు గురయ్యింది. దీంతో ఆమెను ఆస్పత్రికి తరలించగా.. అత్యాచారానికి గురైనట్లు వైద్యులు నిర్ధారణకు వచ్చారు. వెంటనే పోలీసులకు సమాచారం ఇవ్వడంతో అక్కడకు చేరుకుని కేసు నమోదుచేశారు. అనంతరం రాహుల్ను అరెస్టు చేసి జైలుకు తరలించారు.
అయితే, ఆమెపై తాను అత్యాచారం చేయలేదనీ, ఇద్దరం ఇష్టపడే లైంగిక చర్యలో పాల్గొన్నామని రాహుల్ కోర్టులో వాదించాడు. ఆమెను వివాహం చేసుకోడానికి జైలు నుంచి విడుదల చేయాలని కోరాడు. ఇరు కుటుంబాలు పెళ్లికి అంగీకరించడంతో పెరోల్ కోసం గోపాల్గంజ్ జ్యూడిషీయల్ మెజిస్ట్రేట్‌ను ఆశ్రయించాయి. నాలుగు రోజుల పెరోల్ కోరగా.. కోర్టు మాత్రం నాలుగు గంటలు మాత్రమే ఇచ్చింది. దీంతో శుక్రవారం జైలు నుంచి వచ్చిన రాహుల్.. అత్యాచార బాధితురాలిని స్థానిక దుర్గాదేవి ఆలయంలో పెళ్లి చేసుకున్నాడు. వివాహతంతు ముగిసిన తర్వాత జైలుకు వెళ్లి లొంగిపోయాడు.
పెళ్లి చేసుకోవాలనే ఉద్దేశంతోనే రాహుల్ కుమార్, బాధిత యువతి మార్చి 4న రాత్రి స్నేహితుడి ఇంటిలో గడిపారని గోపాల్గంజ్ ట్రెయినీ డీఎస్పీ సాక్షి రాయ్ చెప్పారు. అయితే, ఆమె ఆరోగ్యం క్షీణించడంతో బాధితురాలి స్టేట్‌మెంట్ ఆధారంగా రాహుల్ కుమార్‌పై కేసు నమోదుచేసి అరెస్ట్ చేశామని అన్నారు. మరోవైపు, రాహుల్ను విడుదల చేయాలని అతడి కుటుంబ సభ్యుల కోరుతున్నారు. యువతిపై అత్యాచారం చేయలేదని.. వారిద్దరు ప్రేమించుకున్నారని చెబుతున్నారు. రాహుల్ శిక్షను రద్దు చేయాలని డిమాండ్ చేస్తున్నారు. వారిద్దరు మేజర్లని, వారికి ప్రేమిచుకునే హక్కు, పెళ్లి చేసుకునే అర్హత ఉన్నాయని అన్నారు. ఇప్పుడు బాధితురాలిని రాహుల్ పెళ్లి చేసుకున్నాడని.. అందుకైనా అతడిని విడుదల చేయాలని కోరుతున్నారు.