అమెరికా అధ్యక్షుడు జో బైడెన్ ఉక్రెయిన్ లోని తమ దేశ పౌరులకు స్వదేశానికి రావాలని పిలుపునిచ్చారు. వెంటనే ఉక్రెయిన్ వీడి వచ్చేయాలని సూచించారు. రష్యా ప్రత్యక్ష కాల్పుల కసరత్తులతో, యుద్ధ సన్నద్ధతను పరీక్షించుకుంటోందని అన్నారు. ఈ నేపథ్యంలో ఉక్రెయిన్ పై రష్యా ఎప్పుడైనా దాడి చేయవచ్చని పేర్కొన్నారు.
ఇలాంటి విపత్కర సమయాల్లో అక్కడ ఉండటం అంత మంచిది కాదన్నారు. 1,30,000 మంది రష్యా సైనికులు ఆయుధ సంపత్తితో ఉక్రెయిన్ సరిహద్దుల్లో మోహరించి ఉన్నారని జో బైడెన్ పేర్కొన్నారు.
’’ప్రపంచంలోనే అతిపెద్ద సైన్యంతో డీల్ చేస్తున్నాము. పరిస్థితి చాలా భిన్నమైనది. చాలా వేగంగా పరిస్థితి అదుపుతప్పి పోవచ్చు’’అని జో బైడెన్ పేర్కొన్నారు. ఏ పరిస్థితుల్లోనూ తాను ఉక్రెయిన్ కు దళాలను పంపించేది లేదని స్పష్టం చేశారు. ఉక్రెయిన్ పై రష్యా దాడికి దిగితే అమెరికన్లను రక్షించేందుకు కూడా దళాలు పంపించబోమని సంచలన వ్యాఖ్యలు చేశారు.
‘‘రష్యన్లు, అమెరికన్లు ఒకరిపై ఒకరు కాల్పులకు దిగితే అది ప్రపంచ యుద్ధానికి దారితీస్తుంది. మనం ఇప్పుడు చాలా భిన్నమైన ప్రపంచంలో ఉన్నాం” అని బైడెన్ పేర్కొన్నారు. ఆయన మాటలను బట్టి ఉక్రెయిన్ పై రష్యా యుద్ధానికి దిగితే తాము జోక్యం చేసుకోబోమన్నట్టుగా ఉందని నిపుణులు చెప్తున్నారు. మరో ప్రపంచ యుద్ధం రాకూడదన్నది బైడెన్ యోచనగా ఉందని అనుకుంటున్నారు.
