కాంగ్రెస్ అగ్రనేత రాహుల్ గాంధీ చేపట్టిన భారత్ జోడో యాత్ర హర్యానాలో కొనసాగుతోంది. యాత్ర ఈ రోజు కర్ణాల్ ప్రాంతానికి చేరుకుంది. అక్కడ ఆయన రాష్ట్ర అథ్లెట్లను కలుసుకున్నారు. అనంతరం కబడ్డీ ఆటను ఆయన ప్రత్యక్షంగా వీక్షించారు. దీనికి సంబంధించిన వీడియోలు వైరల్ అవుతున్నాయి.
ఆయనతో పాటు సీనియర్ నేత, హర్యానా మాజీ ముఖ్యమంత్రి భూపేందర్ సింగ్, కేసీ వేణుగోపాల్, కుమారి షెల్జా, దీపేందర్ హుడా, ఇతర పార్టీ నాయకులు కూడా ఉన్నారు. రాహుల్ గాంధీని కలుసుకున్న అనంతరం కబడ్డీ ఆటగాడు దీపక్ నివాస్ హుడా మీడియాతో మాట్లాడారు.
తాను గతంలో రాహుల్ గాంధీని రాజస్థాన్‌లో కూడా కలుసుకున్నట్టు చెప్పారు. అథ్లెట్లతో ఇంతకు ముందు ఎవరూ ఇంత బాగా మాట్లాడలేదన్నారు. ఈ నెల 5న భారత్ జోడో యాత్ర హర్యానాలో ప్రవేశించింది. యూపీలోని పానిపట్ జిల్లా నుంచి సనౌలి కుర్ద్ ద్వారా హర్యానాలోకి ఎంటర్ అయింది.
రాష్ట్రంలో భారత్ జోడో యాత్ర మంగళవారంతో ముగియనుంది. కర్నాల్‌లో భారత్ జోడో యాత్రకు ఈ రోజ అద్భుతమైన స్పందన లభించింది. యాత్రలో ఈ రోజు భారీ సంఖ్యలో పార్టీ కార్యకర్తలు, అభిమానులు పాల్గొన్నారు. ఎముకలు కొరికే చలిలోనూ కొందరు అంగీలు విప్పి డ్యాన్సులు చేశారు.