‘బిచ్చగాడు’ సినిమాలో అప్పట్లో సెన్షేషనల్ హిట్ అయ్యింది. తల్లికోసం బిచ్చగాడిగా మారిన ఓ యంగ్ బిజినెస్ మేన్ కథ. దేశ వ్యాప్తంగా ఉన్న బిచ్చగాళ్ళ నేపథ్యాన్ని ఇతివృత్తంగా తీసుకుని మానవ సంబంధాలను చూడాల్సింది డబ్బు,అధికారంతో కాదు, నిండు మనసుతో అని అనిబలంగా చెప్పిన కథ ఇది.
హీరోగా విజయ్ ఆంటోనీ నటించిన ‘బిచ్చగాడు’ విడుదలై 100 రోజులకు పైగా ప్రేక్షకులను అలరించింది. డిఫరెంట్ కాన్సెప్ట్తో బాక్సాఫీస్ వద్ద కలెక్షన్ల వర్షం కురిపించింది. ఈ సూపర్ హిట్ చిత్రానికి సీక్వెల్గా ఆంటోనీ స్వీయ దర్శకత్వంలో ‘బిచ్చగాడు 2′ తెరకెక్కిస్తున్నారు.ఈ మూవీ వేసవిలో విడుదల కానుంది.
ఈ సందర్భంగా చిత్ర బృందం ప్రచారాన్ని సరికొత్తగా ప్రారంభించింది. టీజర్‌, ట్రైలర్‌లకు భిన్నంగా..’స్నీక్ పీక్ ట్రైలర్’ అంటూ సినిమా ఓపెనింగ్‌ సన్నివేశాన్ని విడుదల చేసింది. ఈ స్నీక్ పీక్ ట్రైలర్ ఆద్యంతం ఉత్కంఠగా సాగింది. ఎప్పుడూ ప్రయోగాలు చేయడంలో ముందు వరుసలో ఉండే విజయ్..ఇప్పుడు మరో మెట్టు ఎక్కి ఈ చిత్రాన్ని వినూత్న కాన్సెప్ట్తో తెరకెక్కించారని తెలుస్తోంది.
స్నీక్ పీక్ ట్రైలర్ ప్రకారం.. ‘బ్రెయిన్ ట్రాన్స్ప్లాంట్’ ఆధారంగా రూపొందుతున్నట్లు కనిపిస్తోంది. చివరలో డబ్బు లోకాన్ని ఖాలీ చేస్తోంది అంటూ పవర్ ఫుల్ మెసేజ్ ఇచ్చారు. దీంతో, ఈ ట్రైలర్ సినిమాపై అంచనాలను ఒక్కసారిగా పెంచింది.
కిడ్నీ, గుండె లాంటి అవయవమార్పిడి విధానాలు ఇప్పటికే కొనసాగుతున్నాయి. కానీ బ్రెయిన్ ట్రాన్స్ప్లాంట్ అనేది ప్రస్తుతం ప్రయోగాల దశలోనే ఉంది. ఈ కాన్సెప్ట్తోనే విజయ్ బిచ్చగాడు2 సినిమాను తెరకెక్కిస్తున్నారని తెలుస్తోంది.
ఇలాంటి సైన్స్ ఫిక్షన్ కథలను హాలీవుడ్లోనే ఎక్కువగా చూస్తాం. కానీ ఇప్పుడు ఇలాంటి సబ్జెక్ట్ తో సినిమాని ఎలా డిజైన్ చేసుంటారనేది ఆసక్తి రేకెత్తిస్తోంది. ఈ సినిమా గురించి పూర్తిగా తెలియాలంటే విడుదలయ్యే వరకు వేచి చూడాల్సిందే.
ఈ చిత్ర షూటింగ్ సమయంలోనే విజయ్ ఆంటోనీ గాయపడ్డారు. జనవరిలో మలేషియాలో జరిగిన బిచ్చగాడు 2 సినిమా చిత్రీకరణలో ఆయన ప్రమాదానికి గురయ్యారు. దీంతో విజయ్ దవడ, ముక్కు భాగాల్లో తీవ్ర గాయాలయ్యాయి. సర్జరీ తర్వాత తన ఆరోగ్యం నిలకడగానే ఉన్నట్లు విజయ్ తెలిపారు.
కాగా, ఈ సినిమాను విజయ్ ఆంటోనీ ఫిల్మ్ కార్పోరేషన్ సంస్థ ఆధ్వర్యంలో ఫాతిమా విజయ్ ఆంటోనీ నిర్మిస్తున్నారు. కథ, దర్శకత్వం, సంగీతం, ఎడిటింగ్ విభాగాలన్నీ విజయ్ ఆంటోనీ చూసుకుంటున్నారు. ఈ చిత్రంలో కావ్య తపర్, రాధా రవి, యోగి బాబు, జాన్ విజయ్, హరిష్ పేరడి తదితరులు ప్రధాన పాత్రల్లో నటిస్తున్నారు.