ప్రపంచవ్యాప్తంగా భారీ స్థాయిలో విడుదలైన ‘కేజీఎఫ్-2’ సినిమా.. తెలుగులో, కన్నడలో, హిందీలో అసలు పోటీయే లేనంత‌గా ప్రేక్ష‌కుల‌ను ఆక‌ట్టుకుంది. అన్ని రాష్ట్రాల్లో స‌రిప‌డా థియేటర్లు కూడా దొరుకుతున్నాయి. కానీ.. ఒక్క తమిళనాడులో మాత్రం ఈ చిత్రానికి ఇబ్బందులెదుర‌వుతున్నాయి.
విజయ్ న‌టించిన ‘బీస్ట్’ సినిమా కూడా రిలీజవ‌డంతో ‘కేజీఎఫ్-2’కు కోరుకున్నన్ని థియేటర్లు ల‌భించ‌న‌ట్టు తెలుస్తోంది. ముందే జరిగిన అగ్రిమెంట్ల కార‌ణంగా మేజర్ థియేటర్లు బీస్ట్ కే కేటాయించడంతో ‘కేజీఎఫ్-2’కు స్క్రీన్లు, షోలు బాగా తగ్గిపోయాయిన‌ట్టు తెలుస్తోంది. అయితే.. ‘బీస్ట్’కు నెగెటివ్ టాక్ రావడంతో కథ మారిపోయింది. ఉన్న‌ట్టుండి ‘కేజీఎఫ్-2’కు ఒక్కసారిగా డిమాండ్ పెరిగిపోయింది.
కానీ.. ముందే జరిగిన అగ్రిమెంట్ల వల్ల వీకెండ్ వరకు ‘బీస్ట్’ సినిమానే అత్యధిక థియేటర్లలో నడిచింది. కొన్ని చోట్ల మాత్రం ‘బీస్ట్’ థియేటర్లు వెలవెలబోతూ.. ‘కేజీఎఫ్-2’ డిమాండ్ పెరిగిపోవడంతో వీకెండ్లోనే బీస్ట్ అగ్రిమెంట్ చేసుకున్న థియేటర్లు ‘కేజీఎఫ్-2’ ఇచ్చేశారు. మల్టీప్లెక్సులు ‘కేజీఎఫ్-2’కు షోలు పెంచాయి. అదే సమయంలో డిమాండ్‌ను తట్టుకోవడానికి మిడ్ నైట్, అర్లీ మార్నింగ్ షోలు షెడ్యూల్ చేశారు. రిలీజైన రెండు మూడు రోజుల తర్వాత అర్ధరాత్రి 1 గంటకు, తెల్లవారుజామున 3-4 గంటల మధ్య షోలు వేయడమంటే మామూలు విషయం కాదు.
వీకెండ్ అయ్యాక ‘బీస్ట్’ స్క్రీన్లు, షోలు మరింతగా తగ్గాయి. ‘కేజీఎఫ్-2’ను రీప్లేస్ చేశారు. దీంతో ఈ సినిమా వసూళ్లు ఒక్కసారిగా పెరిగిపోయాయి. సోమవారం చెన్నై సిటీలో ‘కేజీఎఫ్-2’కు 65 లక్షల దాకా వసూళ్లు వస్తే.. ‘బీస్ట్’కు మాత్రం రూ.36 లక్షలే వసూలయ్యాయి. దీంతో ఒక అనువాద చిత్రం ముందు నిలవలేని స్టార్ డమ్ అంటూ విజయ్‌ను యాంటీ ఫ్యాన్స్ సోషల్ మీడియాలో ఆటాడుకుంటున్నారు. ఇందులో ఎక్కువగా అజిత్ ఫ్యాన్స్ ఉన్నారని అంటున్నారు సినీ విశ్లేష‌కులు.
