పచ్చని అడవిలో చిచ్చు పెడతారా?

హైదరాబాద్ : సినీ హీరో విజయ్‌ దేవరకొండకు కోపం వచ్చింది. యురేనియం తవ్వకాలను తప్పుబట్టారు. విచ్చలవిడిగా జరుగుతున్న తవ్వకాల వల్ల 20 వేల ఎకరాల అటవీ ప్రాంతం నాశనమయ్యే ప్రమాదముందని అందరికీ నాలెడ్జ్ పంచే ప్రయత్నం చేశాడు. ‘సేవ్‌ నల్లమల’ ఉద్యమానికి మద్దతు ప్రకటించారు. ‘‘మనం చెరువులను నాశనం చేసుకున్నాం. సహజ వనరులు దెబ్బతినడం వల్ల కొన్ని ప్రాంతాల్లో అతివృష్టి, మరికొన్ని ప్రాంతాల్లో అనావృష్టిని చూశాం. తాగునీటి వనరులు కలుషితమయ్యాయి. అన్నిచోట్లా మనం పీల్చే గాలి నాణ్యత రోజురోజుకూ క్షీణిస్తోంది. ఇప్పుడు పచ్చని నల్లమల అడవులపైనా మన కన్ను పడింది. యురేనియం కావాలంటే కొనుక్కోవచ్చు.. కానీ, అడవులను కొనగలమా?’’ అని విజయ్‌ చేసిన ట్వీట్‌ ఇప్పుడు జనంలో కాస్త కదలిక తెచ్చింది. యురేనియాన్ని కొనలేకపోతే సౌర విద్యుత్తు లాంటి ప్రత్యామ్నాయాలను చూసుకోవాలని విజయ్ పాలకులకు సూచిస్తున్నాడు. పీల్చేందుకు గాలి, తాగేందుకు నీరు లేనప్పుడు యురేనియం విద్యుత్తు శక్తితో ఏం చేసుకుంటామని ప్రశ్నించారు.

నల్లమల అడవులను రక్షించేందుకు రాజకీయం ఉద్యమం చేయాలని మరో సినీనటుడు రాహుల్‌ రామకృష్ణ ట్విటర్‌లో పిలుపునిచ్చారు. భావితరాలకు బంగారు తెలంగాణ ఇస్తామా? యురేనియం కాలుష్యంతో కూడిన తెలంగాణ ఇస్తామా?’ అని జనసేన పార్టీ అధ్యక్షుడు పవన్‌ కల్యాణ్‌ కూడా ట్విటర్‌లో ప్రశ్నించారు. యురేనియం తవ్వకాలపై కొద్ది రోజుల్లో రాజకీయవేత్తలు, మేధావులు, నిపుణులు, పర్యావరణ ప్రేమికులతో రౌండ్‌టేబుల్‌ సమావేశం ఏర్పాటుచేస్తున్నట్టు పవర్‌స్టార్ అనౌన్స్ చేశారు.