తెలుగు చిత్ర సీమ‌లో బాహుబలి ఓ సంచ‌ల‌నం అని చెప్పుకోవ‌చ్చు. దాని తర్వాత ఆ రేంజ్ లో సినిమాలేవీ రావ‌నేది ప్రేక్షకుల న‌మ్మ‌కం. ఇప్పుడున్న సినీ అభిమానుల్లో బాహుబలి ముందు, తర్వాత అనేంత స్థాయికి ఆ సినిమా వెళ్లింది. ఈ సినిమా గురించి సంచ‌ల‌న డైరెక్ట‌ర్ రాజమౌళి తండ్రి విజయేంద్ర ప్రసాద్ తాజాగా ఒక ఇంటర్వ్యూలో మాట్లాడుతూ.. ‘బాహుబలి’ కథ ఎలా పురుడు పోసుకుందో వివరించారు. సినిమాలో చూసిందానికి కొంచెం భిన్నంగా ఒక లైన్ తాను ముందుగా రాజమౌళికి చెప్పానని ఆయన వివరించారు. అయితే.. ఈ కథకు మూలం కట్టప్ప పాత్ర అని కూడా వెల్లడించారు.
‘బాహుబలి: ది బిగినింగ్’లో సుదీప్, సత్యరాజ్ మధ్య వచ్చే సన్నివేశం గుర్తుంది కదా. ‘బాహుబలి’ కథ ఆ సన్నివేశంతోనే మొదలు పెట్టామని.. కానీ అప్పుడు అనుకున్న సన్నివేశం వేరని ఆయన చెప్పారు. ‘‘విదేశాల నుంచి ఒక వర్తకుడు వచ్చాడు ఆయుధాలు అమ్ముకోవడానికి. చూస్తే 80 సంవత్సరాల వయసున్న పెద్దాయన. పిల్లలకు కత్తి యుద్ధం నేర్పిస్తున్నాడు. అది చూసి మీరు గొప్ప వీరుడిలా ఉన్నాడే అని మాట కలిపితే.. మీకు బాహుబలి గురించి తెలియదా..? అని అడుగుతాడు. ఎవరాయన అని ప్రశ్నిస్తే.. తామిద్దరం కలిసి చాలా ఏళ్లు సాధనం చేశాం.. యుద్ధాలు చేశాం అని వివరిస్తాడు.
ఒకసారి అడవిలో వెళ్తుండగా 200 మంది ఒకేసారి వచ్చి దాడి చేశారు. వాళ్లతో అతను యుద్ధం చేస్తుంటే మహాభారతంలో అర్జునుడు ఇలాగే ఫైట్ చేసేవాడేమో అనిపించింది. సాయంత్రం అయ్యేసరికి రక్తంలో తడిసి ముద్దయ్యాడు. కానీ.. అతడి ఒంటి మీద ఉన్న ఒక్క రక్తపు చుక్క కూడా అతడిది కాదు. ఎందుకంటే ఒంటి మీద గాటు పెట్టగల వీరుడు పుట్టలేదు అని ఆ ముసలాయన వివరిస్తాడు. అంతటి వీరుడిని ఒకసారి చూడాలని ఆ వర్తకుడు అడిగితే.. బాధగా ముఖం పెట్టి చనిపోయాడు అంటాడు.
మరి ఎవ్వరూ అతణ్ని తాకలేరు అన్నారు ఎలా చనిపోయాడు అంటే.. కత్తి పోటు కన్నా వెన్నుపోటు బలమైంది. ఆయన్ని నేనే చంపేశా అంటాడు’’ ఆ పెద్దాయన అని చెప్పారు విజయేంద్ర. ఆ తర్వాతి రోజు శివగామి బాహుబలిని నీళ్లలో ఒంటి చేత్తో పైకెత్తుకుని అతడి ప్రాణాలు కాపాడే సన్నివేశం చెప్పానని.. ఇక్కడి నుంచి పాత్రలు, కథ విస్తరణ జరిగిందని విజయేంద్ర చెప్పారు. దీనికి ముందు తాను ఒక భారీ చిత్రం చేయాలనుకుంటున్నానని తనకు రాజమౌళి చెప్పినట్లు విజయేంద్ర వెల్లడించారు.
