బీజేపీలో పీజేఆర్ వారసుడు!

వరుస వలసలు తెలంగాణ రాష్ట్రంలో బీజేపీ బాగా బలపడుతోందనేందుకు సూచికలా? ఒక్కొక్కరూ బీజేపీ బాట పడుతుండటం కాషాయ దళానికి కొత్త బూస్ట్ ఇస్తోంది. లిస్టులో లేటెస్టుగా మరో పేరు.. విష్ణువర్ధన్‌రెడ్డి! PJR వారసుడు..

హైదరాబాద్ : జీవించి వుంటే పీజేఆర్ కచ్చితంగా ఉమ్మడి ఆంధ్రప్రదేశ్‌లో ముఖ్యమంత్రి అయ్యివుండేవాడు. తెలంగాణ రాష్ట్రం ఏర్పడ్డాక రాజకీయ సమీకరణలు కూడా వేరుగా వుండేవి. ఇది అందరూ అనుకునే మాటే. పీజేఆర్‌కు హైదరాబాద్‌లో వుండే పట్టు అలాంటిది. ఇప్పుడు కాంగ్రెస్‌లో రేవంత్ ఎలా డైనమిక్ లీడరుగా క్రేజ్ సంపాదించుకుంటున్నాడో.. అప్పట్లో అంతకు ఎన్నో రెట్లు పీజేఆర్ పేరు సంపాదించేశాడు. కాంగ్రెస్ రాజకీయాల్లో అప్పుడు ఒకే ఒక్కడు పీజేఆర్! అలాంటి పీజేఆర్ వారసుడిగా వచ్చి ఆరంభంలో యూత్‌లో మంచి ఫాలోయింగ్ సంపాదించిన విష్ణువర్ధన్‌రెడ్డి తర్వాత అడుగులు తడబడి ఎక్కడో ఉండాల్సినోడు ఇంకెక్కడో వున్నాడని పీజేఆర్ ఫాన్స్ అనుకుంటూ వుంటారు. ఇలావుంటే, ఇప్పుడు ఈ పీజేఆర్ వారసుడు బీజేపీ తీర్థం తీసుకుంటున్నాడా?

కాంగ్రెస్‌ మాజీ ఎమ్మెల్యే విష్ణువర్ధన్‌రెడ్డి పార్టీ మారుతారన్న ప్రచారం నగరంలో కలకలం రేపింది. బీజేపీ రాష్ట్ర నాయకులు ఇప్పటికే ఆయనతో సమావేశమైనట్టు వార్తలు వస్తున్నాయి. విష్ణు కుమార్తె జనశ్రీరెడ్డి జన్మదిన వేడుకలు తాజాగా దోమలగూడలో జరిగాయి. ఈ వేడుకలో పాల్గొన్న కేంద్ర మంత్రి కిషన్‌రెడ్డి దగ్గరుండి జనశ్రీరెడ్డి చేత కేక్‌ కట్‌ చేయించారు. ఈ సంఘటనే విష్ణు పార్టీ మారుతున్నారన్న వాదనకి బలాన్ని ఇచ్చి ప్రచారంలో పెట్టింది.

ఉప ఎన్నికల్లో అప్పటి ఖైరతాబాద్‌ నియోజకవర్గం నుంచి, 2009లో జూబ్లీహిల్స్‌ అసెంబ్లీ సెగ్మెంట్‌ నుంచి విష్ణు శాసనసభ్యుడిగా ఎన్నికయ్యారు. 2014, 2018 అసెంబ్లీ ఎన్నికల్లో ఓడిపోయారు. ఈ నియోజకవర్గంలో విష్ణుకు తనకంటూ ఓ ప్రత్యేక కేడర్‌ ఉంది. జూబ్లీహిల్స్‌లో బీజేపీని మరింత బలోపేతం చేసేందుకు అగ్రనేతలు విష్ణుతో చర్చలు జరుపుతున్నమాట వాస్తవమే. కాకపోతే, విష్ణు కూడా బీజేపీలోకి వెళ్లిపోయేందుకు డిసైడయ్యాడని తన ఇంట్లో జరిగిన వేడుకే చెబుతోంది.