గత కొద్ది రోజులుగా ప్రపంచ దేశాలను ఒమిక్రాన్ సబ్ వేరియంట్ XBB.1.5 వణికిస్తోంది. ఈ క్రమంలో ఇది శరవేగంగా వ్యాప్తి చెందుతోందని అధికారులు పేర్కొంటున్నారు. తాజాగా సుదీర్ఘ ప్రయాణాలు చేసే వారికోసం ప్రపంచ ఆరోగ్య సంస్థ పలు సూచనలు జారీ చేసింది.
విమానంలో చాలా దూరం ప్ర‌యాణం చేసేవాళ్లు తప్పనిసరిగా మాస్క్‌లు ధ‌రించాల‌ని డ‌బ్ల్యూహెచ్‌వో పేర్కొంది. ఇటీవ‌ల యురోప్‌లో పలు XBB.1.5 వేరియంట్ కేసుల్ని గుర్తించారు. ఆ సంఖ్య త‌క్కువ‌గా ఉన్నప్పటికీ చాలా వేగంగా పెరుగుతున్నట్లు భావిస్తున్నారు.
ఇక అమెరికాలోనూ ఇటీవ‌ల XBB.1.5 వేరియంట్ కేసులు న‌మోదు అవుతున్న‌ట్లు తెలుస్తోంది. కోవిడ్ వ్యాప్తి ఎక్కువ‌గా ఉన్న ప్రాంతం నుంచి వ‌స్తున్న ప్ర‌యాణికులు తప్పనిసరిగా మాస్క్‌లు ధ‌రించాల‌ని డ‌బ్ల్యూహెచ్‌వో అధికారి క్యాథ‌రీన్ స్మాల్‌వుడ్ తెలిపారు.
గత వారం అమెరికాలో 27.6 శాతం XBB.1.5 వేరియంట్ కేసులు న‌మోదు అయ్యాయి. ఒమిక్రాన్‌కు చెందిన వేరియంట్ల‌లో XBB.1.5 చాలా వేగంగా వ్యాప్తి చెందుతున్న‌ట్లు శాస్త్ర‌వేత్త‌లు గుర్తించారు. అయితే XBB.1.5 వ‌ల్ల ప్ర‌పంచ‌వ్యాప్తంగా మ‌ళ్లీ కోవిడ్ తారాస్థాయికి చేరుతుందా లేదా అన్న అంశం ఇప్ప‌ట్లో అంచ‌నా వేయ‌డం క‌ష్ట‌మే.