ఓ సినిమా హిట్టయినప్పుడు ఆటోమేటిగ్గా ఆ దర్శకుడు, హీరోకు క్రేజ్ వస్తుంది. మరీ ముఖ్యంగా ఆ కాంబినేషన్ కు క్రేజ్ పెరుగుతుంది. మళ్లీ మళ్లీ ఆ కాంబోలో సినిమాలు చూడాలనుకుంటారు ప్రేక్షకులు. నిర్మాతలు కూడా గెలుపు గుర్రాలపైనే పెట్టుబడులు పెడతారనే విషయం తెలిసిందే. చాలామంది హీరోలు ఇలా హిట్ కాంబినేషన్లను రిపీట్ చేసినవాళ్లే. కానీ ఒకే ఒక్క కాంబినేషన్ మాత్రం రిపీట్ అవ్వలేదు. అదే రాఘవేంద్రరావు, శ్రీకాంత్ కాంబో.
సరిగ్గా పాతికేళ్ల కిందట వచ్చిన సినిమా పెళ్లిసందడి. రాఘవేంద్రరావు దర్శకత్వంలో శ్రీకాంత్ హీరోగా నటించిన ఈ సినిమా సూపర్ హిట్టయింది. సూపర్ హిట్ అనే కంటే ఇండస్ట్రీ హిట్స్ లో ఒకటి అని చెప్పడం కరెక్ట్. అలాంటి సక్సెస్ తర్వాత రాఘవేంద్రరావు, శ్రీకాంత్ కలిసి వెంటనే మరో సినిమా చేయాలి. కానీ అది సాధ్యం కాలేదు. ఇప్పటివరకు వీళ్ల కాంబినేషన్ లో సినిమా రాలేదు. దీనికి కారణం ఏంటి? దీనిపై హీరో శ్రీకాంత్ సూటిగా స్పందించాడు.
“పెళ్లి సందడి బ్లాక్ బస్టర్ అయిన తర్వాత నేనే రాఘవేంద్రరావు గారి దగ్గరకు వెళ్లి మరో సినిమా చేద్దామని కోరాను. ప్రొడ్యూసర్లు కూడా రెడీగా ఉన్నారు. కానీ పెళ్లిసందడి కంటే మంచి సబ్జెక్ట్ దొరికితేనే చేస్తానన్నారు రాఘవేంద్రరావు. వేరే ఏం చేసినా పోతుందనే ఫీలింగ్ లో ఆయన ఉన్నారు. నాకేమో రాఘవేంద్రరావు గారి నుంచి మరో సినిమా రావట్లేదని నా ఫీలింగ్. భారీ అంచనాల వల్ల కచ్చితంగా ఏ సినిమా చేసినా ఫెయిల్ అవుతుందని రాఘవేంద్రరావు గారు నాతో చెప్పారు. అది నాకు దెబ్బేసింది. అందుకే మళ్లీ ఆయనతో సినిమా చేయలేకపోయాను.”
రాఘవేంద్రరావుతో మరో సినిమా చేయలేకపోయినా, తనకు పెళ్లిసందడి సినిమా ఒక్కటి చాలన్నారు శ్రీకాంత్. ఇక తన తనయుడు రోషన్ హీరోగా అదే టైటిల్ తో రాఘవేంద్రరావుగారి పర్యవేక్షణలో పెళ్లిసందD రావడం చాలా ఆనందంగా ఉందన్నారు.
Also Read: దేశంలోనే ఎత్తైన వ్య‌క్తి.. ఎస్పీ గూటికి..!
