ఏదైన కొత్త సినిమా వ‌చ్చి అందులో ఏదైనా మంచి స‌న్నివేశం కానీ.. మంచి డాన్స్ స్ట‌ప్ కానీ.. లేదంటే ఓ మంచి పాట కానీ ఉంటే.. అది ఇంకో సినిమా వ‌చ్చే వ‌ర‌కు ప్ర‌జ‌ల్లో నాటుకుపోతోంది. కానీ.. సినిమా రిలీజై ఆరు నెలలైనా పుష్పలో అల్లు అర్జున్ తగ్గేదేలే స్టైల్ పాపులారిటీ మాత్రం త‌గ్గ‌డంలేదు. ప్రపంచ వ్యాప్తంగా పలువురు క్రికెటర్లు, సెలబ్రిటీలు పుష్ప స్టైల్ లో తగ్గేదేలే డైలాగ్ ను విపరీతంగా వాడుతున్నారు.
ఆస్ట్రేలియా క్రికెటర్ డేవిడ్ వార్నర్, ఇండియన్ ఆల్ రౌండర్ జడేజా, మాజీ కెప్టెన్ కోహ్లీ ఇలా అందరు పుష్ప స్టైల్ లో తగ్గేదేలే స్టైల్ ను అనుక‌రించడంతో పుష్ప క్రేజ్ దేశవిదేశాల్లో మార్మోగుతోంది. లేటెస్ట్ గా నేపాల్ మహిళా బౌలర్ వికెట్ తీసిన తర్వాత పుష్ఫ స్టైల్ అనుకరించిన ఓ వీడియోను ఐసీసీ తన ట్విట్టర్లో షేర్ చేయడంతో వైరల్ గా మారింది.
దుబాయ్ లో ఫెయిర్ బ్రేక్ ఇన్విటేషనల్ టోర్నమెంట్ జరుగుతోంది. మే 5న టోర్నడో ఉమెన్, సఫెరీ ఉమెన్ మద్య జరిగిన మ్యాచ్ లో నేపాల్ బౌలర్ సీతారాణా మగర్ వికెట్ తీసిన తర్వాత దవడ కింద చెయ్యితో పుష్ప స్టైల్ తో తగ్గేదేలే అంటూ సెలబ్రేట్ చేసుకుంది. అందుకు సంబంధించిన వీడియోను ఐసీసీ ట్విట్టర్లో షేర్ చేసింది.
నేపాల్ బౌలర్ సీతారాణా మగర్ మోస్ట్ పాపులర్ సెలబ్రేషన్స్ చూడండి అంటూ క్యాప్ష‌న్ ఇచ్చింది. ఇప్పుడా వీడియో సోష‌ల్ మీడియాను ఓ రేంజ్ లో ఊపేస్తోంది. ఇప్ప‌టివర‌కు ఈ వీడియోను 19 లక్షలకు పైగా చూశారు. 3 లక్షలకు పైగా లైక్ చేశారు.