వామ్మో ఇంత పొడవైన పన్నులు మీరు ఎప్పుడైనా చూశారా.. ఓ వ్యక్తి నోట్లో నుంచి ఏకంగా 37.5 మిల్లీమీటర్ల పొడవున్న పన్నును తీశారు డాక్టర్లు. ఈ ఘటన జమ్మూకశ్మీర్ బుద్గాం జిల్లాలో జరిగింది. ఓ వ్యక్తి నోట్లో నుంచి భారీ పన్నును బయటకు తీశారు డాక్టర్లు. ప్రపంచంలోనే అతి పెద్ద పన్ను ఇదేనని వారు చెబుతున్నారు. ఎస్డీహెచ్ బీడ్వా ఆస్పత్రిలో చేరిన ఓ వ్యక్తి నోటి నుంచి ఈ పన్నును బయటకు తీసినట్లు డాక్టర్ జావైద్ అహ్మద్ పేర్కొన్నారు.
బాధితుడికి గత 10-15 రోజుల నుంచి పంటి నొప్పి తలెత్తిందని, దీంతో ఆ వ్యక్తికి ఎక్స్రే తీయగా.. పన్ను సైజు అధికంగా ఉందని తెలిసిందన్నారు. దాన్ని తొలగించాల్సిన అవసరం ఉందని వైద్యులు చెప్పగా.. అందుకు రోగి ఒప్పుకున్నాడు. దీంతో శనివారం ఆపరేషన్ నిర్వహించి పన్నును బయటకు తీశారు డాక్టర్లు.
పన్నును తొలగించేందుకు దాదాపు గంటన్నర సమయం పట్టిందని డాక్టర్ వివరించారు. గిన్నిస్ బుక్ రికార్డుల ప్రకారం ప్రపంచంలోనే అత్యంత పొడవైన పన్ను సైజు 37.2 మిల్లీమీటర్లు. ప్రస్తుతం బయటకు తీసిన పన్ను అంతకంటే పొడవుగా ఉంది కాబట్టి గిన్నిస్ రికార్డు ఈ పంటికి వచ్చే అవకాశం ఉందని ఆయన అన్నారు. కాగా ప్రస్తుతం ఈ విషయం సోషల్ మీడియాలో వైరల్ అవుతోంది.